Yn shimti ka Tnad Urban Affairs ban khmih ia ki street lights, pynkhuid ia ki waiar ha Shillong : DyCM

Shillong, Naitung 15: Ka Nongbah Shillong kala pynkhreh ban ioh ia ki lynti iaid kiba tbeh jingshai bad ka suinbneng kaba khuid , da ka jingmynjur ka Tnad Urban Affairs ia ka Plan ba thymmai ban khmih hi ia ki jingtbeh jingshai ia ki surok (street light) bad ban weng noh ia ki waiar kiba sdien rynjain ha ki post elektrik.

U Symbud Myntri Rangbah ka Jylla uba khmih ia ka tnad pynroi sor, u Bah Sniawbhalang Dhar, ula ong ba ka Sorkar ka dang trei ia ka kam, ha kaba kano ka tnad kan khmih ia ka kam kaba kumno, ban pynkut ia ka jingklumar jingmut ha kaban khmih bad ban sumar.

“Ngi dang don ha ka kam. Ban iaid shakhmat, ia ki street light ha kylleng ki jaka yn sa khmih da ka Municipal Board. Ka tnad Bording bad ka Smart City ruh kin sa shimkhia ia ki jingtyrwa” ong u Bah Dhar.

Ka detailed project report (DPR) na ka bynta ka projek ban buh ia ki street light kadei kaba lah dep. Ka tnad mynta kala pynlong ia ki jingialang bad ki Rangbah Shnong ban ithuh ia ki jaka kiba donkam bha ha ka wat kaba nyngkong.

“Jan man la ki jaka kiba kongsan kin sa shah kynthup ha ka wat ba nyngkong. Ka Municipal Board kan sa khmih bad sumar ia ki. Ki don katto katne ki jaka kin dei kiban neh beit bad ka tnad bording” ula ong.

U Bah Dhar ula ong, ba ka jingthmu ka long ban phiah ia ka jingkitkhlieh.

“Ngi lah poi sha kaba kut, kumta kan ym don shuh ka jingklumar jingmut. Ngin sa pynthikna ia ki jaka, kiei ki tnad la kadei ka Municipal ne Bording kiban khmih ia kitei” ula ong.

U Myntri ula kren ruh halor ka jingthmu ka Jylla ban pynkhuid ia ki waiar Cable kiba noh rynjaw ha sor Shillong.

“Ia kane la shimkhia da ka Tnad Urban Affairs. U Myntri Rangbah ula dep ban jurip ia ki jaka bad ula ai ruh ka jingpynbna. Ngin ialeh ban kynthup ia baroh ki jaka kiba kongsan kiba don bun bha ia ki waiar kiba noh rynjaw bad ngin sa pynkynriah bha noh ia ki. Ka thong ka long ban pynkylla ia ka sor kaba khuid bad itynnad” ong u Bah Dhar.