Shillong, Naitung 14 : Ki bor district ka West Jaintia Hills kila pymih ia ka jingbthah sha ki nongshongshnong kiba sah harud ka Wah Kopli bad ki jaka ba sharum ka wah ba kin husiar bha ia ka jingpoi umsaw ha kane ka wah hadien ka jingkiew ka um hapoh ka dam Umrong na ka daw ka jingiai bteng ka jinghap slap.
U Deputy Commissioner bad Chairman ka District Disaster Management Authority (DDMA) Abhivav Kumar Singh ula bthah ia ki paidbah ba kin hisiar bha namar ka lah ban don ka jingpynlait um kaba heh napoh ka dam Khandong.
Kat kum ki bor khmih ka dam, ka jingiai bteng ka jinghap slap ha ki Catchment area ka Khandong kala lam sha ka jingkiew ka um hapoh ka dam. Ki bor khmih kila pyntip ba kin sa ai jingtip ia ka jingplie ia ki khyrdop ka dam Umrong bad ka jingpynlait um haba don ka jingthmu ban pynlait um.
Ki bor khmih kila pynshai ruh ba ka jingheh jong ka um ka ban tuid sha ka wah ba sharum ka Langku kan shong eh ha ka jingpynlait um na ka Kopili Hydroelectric Project (LKHEP).
Kum ki lad jingiada lypa, ki bor district kila kyntu ia ki paidbah ba sah harud jong ka Wah Kopili bad ki jaka ba sharum jong ka Wah ba kin peitthut bha bad ban kiar iaka jingleit tur shakan jong ka Wah namar ka um ka lah ban kiew sted bha hadien ka jingpynlait na ka dam.
