Shillong, Naitung 15 : Ka North Eastern Council (NEC) kala pynlait ia palat T.13.58 klur ka song pisa na ka bynta ban pyntrei ia ki project kam pynroi bapher bapher ha Meghalaya ha kine ki arbnai bala lah, da ka jingkynshew kaba leit sha ka koit ka khiah, ka jingpyniasoh surok, ka jingpynmih bording na ki bor mariang, ka pule puthi bad ki jingtei ha ki shnong.
Kat kum ka kyrwoh ba ka pynlait, ka song pisa, kaba la mang hapoh ka Scheme of NEC (SoNEC) hapdeng u bnai Jymmang-Jylliew 2026, ka thmu ban pyntyllun sted ia ka roi ka par kaba kynthup lang ia baroh ha kylleng ka Jylla.
Napdeng ki project kiba kongsan ka dei ka jingpyndait ia ka 1.5 Tesla MRI System ha TuraCivil Hospital, ka sienjam kaba la khmih lynti ban pynjanai shikatdei eh ia ka rukom ai jingsumar sha ki nongpang ha ri-lum Garo bad ki jaka kiba marjan.
Ka NEC kala kyrshan ia ka jingshna ia ki jingtei ha Shillong Polytechnic bad ka Training-cum Resource Centre bala pynshna da ka NERCORMS ban pynkhlain ia ka Technical Education bad ki jingwanrah ia ki buit treikam ba thymmai.
Ban pynneh pynsah ia ka riti dustur ba hiar pateng ka Jylla, la ai jingiarap song pisa na ka bynta ka Seng Khasi Cultural Complex bad ka Seinraij Jowai Community Hall, katba ka Iewduh-ka Iew tynrai kaba rim duh hapoh ka thain Shatei Lam Mihngi kan ioh ia ka jingshna pynbha ia ki dukan ki ban pynmyntoi ia ki nongkhaii, ki nongrep bad ki nongthied nongpet.
Ha ka kam pynmih bording, ka Council kala bei tyngka ia ka sorjamin bad ka jingtohkit na ka bynta ka Mawblei, Myntdu Leshka Stage-II bad Selim hydroelectric projects, ka ban buh nongrim ia ka jingpynmih bording kaba khuid hapoh ka Jylla ha ki snem ban dang wan.
Ka NEC kala pyntip ruh bala pyndep ban shna pynbha ia ka surok Shillong-Umroi Airport project ha u bnai Jylliew, kaba shim ia ka kum ka jingiarap kaba khraw na ka bynta ka jingpyniasoh ia ka kad, ka kam jngohkai bad ka khaii ka pateng.
