Shillong, Naitung 15: Ki paidbah ba iaid ba ieng haki thain Khyndai Lad ha ka step sngi Balang, kila rit mynsiem namar ka pla bad ka Trolley ba shu ieh haka jaka ieng ki kali arshaka kaba don ha syndah ka OB Shopping Mall.
Kane ka pla ka dei ka rong jyrngam bad ka trolley ka dei ka rong iong. Ia kine ki pla la lap ha ka por 11:30 baje eiei.
Ki paidbah kiba iohi ia kine ki pla ba shu ieh ha katei ka jaka bad ba ym don ba kam trai, kila pyntip mar mar sha ki Pulit Traffic kiba don ha Khyndailad ba kin leh ia kaba donkam.
Ki Pulit mar kumta hi kila ker kut ia ka thain Khyndailad haba mana ruh ia ki kali bad ki briew ba kim dei ban rung sha kane ka jaka.
Tang hadien katto katne por hashuwa ban wan poi ki Pulit Bomb Squad, uwei u briew uba mih na MUDA Complex ula kam trai bad shimti ia kine ki pla.
Ki Pulit kila pynlong ia ka jingtohkit kaba bniah hashuwa ba kin pynlait noh ia ka jingkhang dam ia ka surok.
