Imphal, Naitung 15: Ki bor pahara ki la pynjur ïa ka jingkhynra lang hapoh ka distrik Ukhrul, Manipur ban lapdien ia ki kynhun kaikhlaw kiba hiar thma ia ki shipai Assam Rifle ha ka 6 tarik u Naitung kaba lam sha ka jingiap ki arngut ki shipai.
Kane ka jingkhynra kaba la pynlong ha ka 14 tarik Naitung ha ka thaiñ TM Kasom, la ïashim bynta lang da ki shipai Assam Rifles, ki Indian Army, ki Border Security Force (BSF) bad ki Pulit jong ka Manipur.
Ka dei shibynta jong ka jingpyrshang ban beh krad ïa ki kaikhlaw, ban lap ïa ki tiar pynbthei ba la buhrieh, bad ban khmih hi ïa ki jaka ba lah ban shah thombor ha shilynter ka surok bah National Highway-202.
Ka jinghiar thma ha ka 6 tarik Naitung hajan Nungshang Khong ha Shangshak ka la shim ia ka jingim jong u Warrant Officer u Balwant Singh bad u Havildar C.M. Singh jong ka 40th Assam Rifles Battalion.Ki secrurity agency ki la iathuh ba ia katei ka kynhun la thombor kaba la iatreilang kaba la pyndonkam da ki tiar pynbthei (IED) bad ki jingsiat da ki ktang suloi.
Ki heh ophisar ki la ïathuh ba ki jingkhynra ba jur ki dang pynlong ha ki jaka sah briew, ki jaka jong ka NH-202 bad ki khlaw ba marjan ban wad ïa kito kiba donkti ha ka jingshah thombor.
Katkum ki pulit, lai ngut ki briew ki la shah kem ha ka por ba ki pynlong ia ka jingkhynra da ka tnad syntiat ha ki thain TM Kasom, Litan bad Sikibung ha kaba iadei bad ka jingtohkit halor katei ka jingshah thombor.
Ki shipai Assam Rifles ki la ïathuh ruh ba kum kane ai jingkhynra la pynlong ruh ha ka thaiñ Nungshang ha ka 10 tarik u Naitung bad 11 tarik u Naitung ryngkat ka jingïatreilang bad ki shipai BSF bad ki Pulit ka Manipur kum shi bynta ban ïakhun pyrshah ïa ki kaikhlaw kaba dang ïaid shakhmat.
Ki bor ba dei khmih ki la pynskhem ba ka jingim kaba man ka sngi ka khlem shah ktah wat hapdeng ka jingkhlain jong ka jingpahara, ha kaba ki kam rep kam riang ki ïai bteng, ki dukan ki plie beit bad ka jingïaid kali kaba la pynbeit ryntih ki la ïaid ha ka surok NH-202.
Hynrei na ka liang ka Working Committee jong ka Tangkhul Naga Long ka la kynnoh ba ki don saw ngut ki briew kiba la shah kem ha ka por ba pynlong ïa ki jingkhynra bad ki la dawa ban pyllait noh mardor ïa ki.
Hadien katei ka jingshah ambush, ka sorkar Manipur, ka la pynbna ban bishar bniah ia ka buit pyrshah ia ki kaikhlaw. U myntri kam pohiing ka jylla, u Govindas Konthoujam, u la ong ba ka sorkar kan shim ia ka “jingpyrkhat kaba thymmai” ha ki kam pahara bad u la pynthikna ban buh da ki CoBRA commando ban pynkhlain ia ki jingpyrshang ban iakhun pyrshah ia ki kaikhlaw.
Kane ka jinghiar thma ha Ukhrul ka wan hadien katto katne sngi ba la don sa kawei pat ka jinghiar thma kaba jur ïa ki bor pahara ha ka thaiñ Shatei Lammihngi. Ha ka 14 tarik Naitung, ka jingbthei IED ha Nagaland jong ka District Chümoukedima, ha kaba u wei u shipai ka Assam Rifles u la iap, kaba la pynlong ia ki bor pahara ban pynjur ia ka jingkhynra ha kylleng ka thain.
Ki bor pahara ki la iathuh ba ka search operation ha Ukhrul ka dang iaid shakhmat, ha kaba ki jingpyrshang ki long ban lap ia kiba don kti ha ka jingambush bad ban pynneh biang ia ka jingpahara ha katei ka thain.
