Guwahati, Naitung 14: Ka jinglong jingman jong ka jingshlei um ha Assam, ka la nang jur ha ka sngi ba-ar, ha kaba ka jingiap jong ki briew, ka la kiew sha ka saw ngut, namar ba ka jingshlei um kaba nyngkong, ka dang iai bteng ban ktah ia ki katto katne ki bynta jong ka Jylla.
Palat 37,000 hajar ngut ki briew ki la shah ktah ha kylleng ki 6 tylli ki district, ha kaba ki heh ophisar ki la maham ba ka jinglong jingman ka lah ban nang sniew lada jia ba u slap uba jur u dang bteng ha ka jylla ba marjan jong ka Arunachal Pradesh, na kaba katto katne ki wah ki tuid sha Assam.
Katkum ki khubor, la ong ba ka jingiap ka dei na ka Chariduar Revenue Circle kaba don ha Sonitpur District. Utei u lanot u la jah rngai ha ka miet jong ka sngi Nyngkong, bad la lap ia ka met jong u ha ka sngi Ba-ar.
Katkum ka jingkhein jong ka Assam State Disaster Management Authority (ASDMA), kane ka jingshlei um ka la ktah ia palat 37,032 ngut ki briew, ha Lakhimpur ka la paw kum ka District kaba la shah ktah jur tam, kaba don haduh 35,696 hajar ngut ki nongshong shnong kiba la shah ktah.
Katei ka jingshlei um, ka la ktah ïa ki 6 tylli ki district—ka Sonitpur, Dibrugarh, Lakhimpur, Dhemaji, Jorhat bad Sivasagar—ha kaba la pynngam ïa ki 99 tylli ki shnong ha kylleng ki 12 tylli ki jaka revenue circles.
Ki kam ai jingiarap ne ki Relief operations ki dang iaid shakhmat, ha kaba ka bor pyniaid ki dang sam ia ki tiar ba donkam lyngba ki 20 tylli ki jaka ai jingiarap.
Ha ki 24 kynta ba ladep, ka State Disaster Response Force (SDRF) ka la ioh ban pyllait im ia 16 ngut ki briew na ki jaka ba la shah ktah ha ka jingshlei um jong ka district Sonitpur.
Ka jingshlei um ka la ktah jur ruh ia ka rep ka riang bad ka jingri jingdup. Ka ASDMA ka la ong ba 1,103.94 hectare ki jaka rep ki la shah tap um. Ar tylli ki mrad ki la shah rong noh ha ka um, katba 16,139 tylli ki jingri ki la shah ktah ha ka jingshlei um.
Ki bor pyniaid ki dang bniah ia ka jinglong jingman namar ka jingbteng jong u slap ha ki jaka lum ba shalor ka buh jingma ban pynjur ia ka jingshlei um ha ki distrik ba shapoh.
