Ruid map ka NESAC ia ka khappud India-Myanmar | Pyniar ia ka space technology ha Northeast

Shillong, July 15: Ka North Eastern Space Applications Centre (NESAC) kala leh ia ka bynta kaba khraw ha kaban iada ia ka Northeastern Frontier jong ka ri ha ryngkat ka lamkhmat ia ka roi ka par lyngba ka Space Technology, ong u Myntri ka Sorkar Pdeng u Dr Jitendra Singh hynne ka sngi Baar.

Ha ka jingialang bishar bniah ia ki prokram jong ka NESAC ha ka ophis treikam ka jongka kaba don ha Umiam, u Myntri ula ong, ba ka Sorkar Pdeng ka kala shimkhia ia ka Geospatial Mapping ia u pud u sam khappud jong ka ri India bad Myanmar bad ïa ki pud u sam hapdeng ki Jylla ha ka thaiñ shatei lammihngi, katba ha kajuh ka por ka jingpyntreikam ïa ki projek bapher ha ka rep ka riang, Disaster Management, Water Resources, ki khlaw ki btap bad ka jingai jingshakri ha ka kam synshar khaddar.

U Myntri ula pyntip ba ka NESAC kala kylla long kum ka jaka treikam kaba kongsan tam, ym tang ha kaban kyrshan na ka bynta ka jingshngain ka ri hynrei la pyndonkam ruh ia ki Satellite bad Geospatial Technology ban shimkhia ia ki jingtynjuh ia ki kam pynroi ha ka thain.

Ki ophisar kila pyntip ia u Myntri Sorkar, ba ka NESAC kala pyntreikam ia ki 130 tylli ki Space Application Project ha kylleng ki bynta jong ka thain shatei lammihngi, kynthup ïa kumba 50 tylli kiba dang shu dep bad 78 tylli ki sienjam kiba dang ïaid shakhmat kiba kynthup ïa ka rep ka riang, ki khlaw ki btap, ki tyllong um, ki Geoscience, ka jingthmu na ka bynta ki jaka sor bad ki thaiñ, ka Geoinformatics bad ka Information Technology, ki jingpyniasoh lyngba ki Satellite, ki UAV Application, Space and Atmospheric Sciences, ka jingkyrshan ia ka jingiada na ki jinglynshop ki bor ka mariang bad ka jingpynsaphriang jingtip bad ki sienjam ban kyntiew ia ka bor treikam.

Ula ong, ba ka Centre kala long kum ka jingpyniasoh hapdeng ki Space Programme ka India bad ki kam pynroi ha ki shnong ki thaw. U Singh ula ong, ba kane ka jingiatreilang bad ki Sorkar Jylla kala pynlong ia ka Space Technology ban kylla long ka atiar kaba treikam pura na ka bynta ban pynwandur ia ki jingtei, ban pyndonkam ia ki spah ka phew jong ka mariang bad ban kyntiew ia ka jingai jingshakri ia ki paitbah.

Ka thain shatei lammihngi kaba mad ia ka jingshlei um man ba wan ka aiom lyiur, u Myntri ula bthah ia ka NESAC ba kan pynbha shuh shuh ia ka jingbatai kaba bniah bad paka kum ka bynta ban ai lypa ia ki jingmaham, khnang ba ki jaidbynriew kiban shah ktah kin ioh ia ki jingtip bad ki jingmaham kiba mardor.
Ula kyntu ruh ia kane ka Centre ban iatreilang bad ki Sorkar Jylla ban pyntreikam ia ka jingseisoh jong ka Water Harvesting, kynthup ia ka sienjam kaba la shim ha Ramakrishna Mission ha Cherrapunjee, ban pynkhlain ia ka jingshngain ha ka jingdon ia ka um ha ka thain.

U Myntri ula kyntu ïa ka jingïatreilang kaba kham jan hapdeng ka NESAC, ka North East Cane and Bamboo Development Council (NECBDC) bad ki Sorkar Jylla kiba dei peit ban pyndonkam pura ia ki jingmyntoi na ka Bamboo Mapping Programme jong ka Sorkar Pdeng kaba dang ïaid shakhmat mynta.

Ula ong, ba ka Scientific Mapping ia ki jingdon jingem ia ki siej kan iarap ban pynkhlain ia ka jingkyntiew ia ki kam ban pynwandur ha kaba iadei bad ki siej, kan pynkhlain ia ka rukom pynmih bad pyniaid ia ki siej bad kyntiew ia ki lad kamai jakpoh kiba lah ban iaineh.

U Dr Jitendra Singh ula banjur ia ka jingkongsan jong ki Geospatial Technology ha ki thain khappud jong ka ri India bad ong, ba ka NESAC kadei ban bteng ban kyrshan ia ki jingbuh hakhmat eh jong ka ri ha ki jaka kiba long kongsan tam da kaba iatreilang bad ki tnad bapher bapher.

Ula pynshlur ruh ïa kane ka Centre ban pynkhlaiñ ïa ka ‘ManzilNE’ GeoTourism Dashboard, da kaba pyndonbynta lang ia kito kiba donbynta lang ha ka kam bad ula ong, ba ka Technology ka lah ban leh ia ka bynta kaba khraw ha kaban pyninam ia ka jingriewspah ka thaiñ shatei Lammihngi ia ki jingdon jingem bad ia ka kolshor naduh hyndai hynthai.

U Singh ula kyntu ruh ïa ka NESAC ban don ia ka jingiatreilang kaba khlain bad ki tnad sorkar pdeng, ki sorkar jylla, ki jaka wad bniah, ki jingsengkam bad ki karkhana ban pynsted ia ka jingpyndonkam ia ki Technology kiba iadei bad ka haw-haw.

Ula ong, ba ka thain shatei lammihngi kadei kawei na ki thain kaba la sted ha kaban kiew shaphrnag hapoh ka sorkar kaba la ialam da u Narendra Modi bad ula ong, ba jaka treikam kum ka NESAC kan iai bteng ban leh ia ki kam kiba kongsan ha kaban pynbha ia ka rukom ai jingshakri ka sorkar, ban pynkhlain ia ki jingkyrda haba wan lynshop ka bor mariang, ka jingkyrshan ia ki kam pynroi lyngba ka jingpyndonkam ia ki Space Application.