Shillong, Naitung 15: U Myntri ka Koit Khiah u Bah Wailadmiki Shylla hynne ka sngi Baar, ula ong, ba ka jingpang Tuberculosis ha ka Jylla kala paw ba kala sdang hiar bha hynrei ula banjur pat ia ka jingdonkam ban don ia ka jingai jingpynsngewthuh bad ka jingkyrshan ha ka rukom ai bam ban pynneh ia ka jingiohnong.
Haba kdew ia ka kaiphod kaba la mih dang shen, u Bah Shylla ula ong, ba ka jinghiar kam long satia kaba ryntih hynrei ki don katto katne ki jaka kiba donkam ban phaikhmat bha. “Ka rukom long kala hiar bha. Hynrei kila don pat ki thaiñ bad ki jaka kiba donkam ban phaikhmat bha” ula ong.
U Myntri ula pynpaw ruh ba ka jingieh noh shiteng por ia ka jingsumar, kadei ka jingtynjuh kaba khraw bad ula kyntu ia ki paitbah ban iashimbynta ha kaban ai jingkyrshan ia ki nongpang.
“Ngi kyntu ia ki paitbah ba kidei ban mih shakhmat bad ban shim ne ‘Adopt’ ia kitei ki nongpang namar ba kila don ki jingjia ba kila jah noh bad kim shim la buddien shuh ia ka jingioh jingsumar. Ki hap ban shim dawai na ka bynta katto katne por” ula ong.
Haba banjur ia ka jingkongsan jongka rukom bam ha ka por ba ioh jingsumar, u Bah Shylla ula ong, ba ula thoh sha baroh ki MLA ban shim ne ‘Adopt’ ia ki nongpang TB ha ki Constituency ki jongki bad ban iarap ia ki lyngba ka jingai jingkyrshan da ka pisa na ka bynta ban ioh ia ka bam, khamtam eh ia kito kiba duk ha ka thain nongkyndong.
“Ha ka por ba ki ioh jingsumar, ki donkam ruh ban ioh ia ki jingbam kiba tei. Dei halor kane ba nga lah kyrpad ia ki MLA ba kin ai jingkyrshan ba kin thied ia ki jingbam kiba tei” ula ong.
Ula pynpaw ia ka jingskhem jingmut ba kum kine ki sienjam kin iarap shuh shuh ha kaban nang pynhiar ia ka jingpang TB.
U Bah Shylla ula bynrap ba ki don 2-3 tylli ki district kiba long ki jaka kiba don bha ia ka jingsngewkhia hynrei ym shim la treh pat ban batai ia ka kyrteng jong kitei ki jaka.
