Shillong, Nailur 29: Ka Amendment 2022 kaba weng ia ka kyndon ba pynlong kongsan na ka Meghalaya Compulsory Registration of Marriage Act, 2012 kala pyntlot bor ia ka aiñ ban iada ia ki longkmie kiba la shah ieh lok ha ka jingiashongkha ka bym pat rejistar ne Unregistered Marriage, la ong ka Maitshaphrang.
Ha ka shithi kaba la phah sha ka Chairperson jong ka Meghalaya State Commission for Women (MSCW), u Convenor u Bah Michael N Syiem ula kyrpad ia ka Commission ba kan tuklar ban pyntreikam mardor ia ka aiñ kumba ka long mynshwa.
“Ia katei ka Aiñ la mynjur da kawei ka sur, da ka jingthmu ban shimkhia ia ka jingjur jong ka jingpait jingpra ha ka shongkha shongman, khamtam eh ia ki jingiashongkha ki bym pat rejistar, ha kaba bun ngut ki longkmie bad ki khun kila shah ieh ha la u kurim khlem ka jingioh ia ka bai bam ne ka jingkyrshan ia ki khun” la ong u Bah Syiem ha ka shithi.
Ula kdew ba u Myntri Rangbah ka Jylla u Conrad K Sangma dalade hi ula rah ia katei ka mat hapoh ka iingdorbar thawain ka jylla ha ka 11 tarik u Lber 2021, haba jubab ia ka Zero Hour Notice jong u MLA ka North Shillong u Bah Adelbert Nongrum.
“Lah iohi ba ia katei ka rukom leh jong ka jingiashongkha khlem ka jingpyndap ia ka jingkyntiew kurim bad ka jingrejistar kadei kaba jur bha bad kane ka lam sha ka jingkiew jong ka jingshah ieh lok ki kynthei ha u kurim u jongki bad kine ki longkmie kila shah ieh ban pyndap pynbiang hi ia dalade bad ia la ki khun namar ka jingbym don ia kino kino ki kot ki sla ban pynshisha ia ka jingshong kurim ka jongki” ong u Bah Syiem da kaba sot ia ki jingkren jong u Myntri Rangbah.
Katkum ka jingong ka jongu, ka jingbym don ia ka ain kaba khlain, “Ka long kaba suk ia uno uno u rangbah ban shu iaid beit namar ka jingbym rejistar ia ka jingkyntiew kurim khamtam eh hapdeng ki jaidbynriew Khasi-Pnar khlem da ai ia ka bai bam bad ieh ia la ka kurim bad ki khun kiba mad ia ki jingshah shimkabu”.
Ka Maitshaphrang kala ong, ba ka Commission ka tip bha ia kine ki jingjia kiba jia, namar ba bun ki longkmie kiba la shah ieh lok kila leit wad ia ki lad ban ioh ia ka jingiarap ha kaban ioh ia ka bai bam bad kila shem jingeh namar ka jingbym rejistar ia ka jingia shongkurim ka jongki.
U Bah Syiem ula ong ba ka Chairperson kaba rim jong ka MSCW ka Kong Phidalia Toi ha ka kot ka jongka kaba la ai kyrteng ‘Matrilineal System in Meghalaya’ ia ka jingwad bniah ha u snem 2016 kaba la bei tyngka da ka National Commission for Women bad pynlong da ka MSCW ryngkat ka NEHU bad Martin Luther Christian University kila shem ba 13.25 percent jong ki longkmie ha Meghalaya kidei ki ‘Single Mother’ ne ki bym don kurim shuh, bad don katto katne ki longiing longsem kiba baroh ar ka kmie bad ka khun kynthei kidei kiba la shah ieh lok.
“Ha ki katto katne ki jingjia, ka kmie kaba la kut lad bad ka khun kynthei kila shah pynbor ban leh ia ki kam awria tang na ka bynta ban im” ula sot ia ka jingpynpaw ka Kong Phidalia Toi.
Ula kdew ruh ia ka jingpynpaw u DGP barim ka Jylla u R Bishnoi ha ka state-level anti-human trafficking conference kaba la long ha ka 24 tarik u Lber 2023, ba bun ki bynta jong ka imang sahlang kiba noh synniang sha ka jingkhaii met. Kaba bun hi na ki jingjia ha ka imlang sahlang kadei na ka jingpait jingpra jong ki longiing longsem ne ki kynthei ki bym don kurim shuh. Kane kala jur bha ka jingkiew hapoh Meghalaya haba ianujor bad kiwei pat ki jylla. Kadei namar kitei ki daw kaba ki samla shynrang bad kynthei ki ngat ha ka khaii met”.
U Bah Syiem ula ong, ba ka Meghalaya Compulsory Registration of Marriage (Amendment) Act, 2022 kala pynduh noh ia ka ‘Preamble’ kaba ong “Ka long kaba kongsan ia u rangbah uba la shongkurim bad ka longkmie kaba la shongkurim ba kin aiti ia ki kot ki sla bad iaka ‘Marriage Certificate ne ki syrnod iashongkurim na ka bynta ki jingdonkam baroh”
Kane kala pynduh bor noh ia baroh ki jingkongsan jong katei ka aiñ ban tehlakam ia ka jingkiew jong ka jingshah ieh ki longkmie bad ki khun” ula ong.
Kane ka kynhun kala kyntu ia ka Women’s Commission ban tynruh ia ka sorkar jylla ban wanrah biang ia katei ka kyndon kaba la pynduh noh da kaba kdew shai “official purposes” ha ka bynta ban pynlong kongsan ban aiti ia ka ST/SC Certificate, khnang ba ka jingthmu jong katei ka kyndon ain kaban shimkhia ia katei ka kam, kan lah ban iarap ha kaban shimkhia ban pynbeit ia katei ka jingeh jong ka jingshah ieh lok”.
