Assam | Mih jyndat ka Liang Pyrshah na Iingdorbar haba dawa ithuh ST ia 6 tylli ki Jaidbynriew

Guwahati, Naitung 14: Ka Liang Pyrshah ka la mih jyndat na ka Dorbar mang tyngka ka iingdorbar thaw ain ka Assam ha ka sngi ba-ar haba pynpaw ia ka jingpyrshah halor ka jingbym ai jingithuh ka sorkar ia ka kyrdan Scheduled Tribe (ST) ia ki hynriew tylli ki jaidbynriew jong ka Assam, kiba kynthup ia ki jaidbynriew Moran, Motok, Chutia, Tai Ahom, Koch-Rajbongshi bad Adivasi (Tea Tribe).

U Nongïalam ka Liang Pyrshah Wazed Ali Choudhury u la ong ba ka BJP ka la kular bunsien ban ai kyrdan ST ïa ki 6 tylli ki jaidbynriew shwa ka elekshon hynrei kam shym la lah ban pyndep ïa ka jingkular hadien ba ka la wan ha ka bor.

“Ngi la rah ia kane ka mat ha Assembly mynta ka sngi, hynrei ngim pat sngewhun satia ia ka jubab jong u Myntri. Dei na kata ka daw ba ngi la mih noh na ka iing dorbar,” ong u Choudhury haba kren sha ki nongthoh khubor shabar ka Dorbar.

U MLA ka Raijor Dal, Akhil Gogoi, ula kynnoh ba ka sorkar BJP, ka la pynkheiñ ïa ka jingkular jong u Myntri Rangbah duh ka ri, u Narendra Modi ha ka elekshon 2016.

“Ha u snem 2016, u Myntri Rangbahduh ka ri, u Narendra Modi, u la kular ha ka jingialang paidbah, ba ki 6 tylli ki jaidbynriew jong ka Assam, kin ioh noh ia ka kyrdan Scheduled Tribe, hapoh 6 bnai, lada ka BJP ka wan ha ka bor. Mynta, la jan 11 snem, hynrei ka jingkular, ka dang sah khlem urlong,” la ong u Gogoi.

U la kdew ruh ia ka Constitution (Scheduled Tribes) Order (Amendment) Bill kaba la wanrah ha Parliament ha u snem 2019, da kaba buh jingkylli balei ym shym la pyntreikam ia katei ka jingtyrwa.

“Mynta ka sngi, baroh ki seng jong ka liang pyrshah ki la ïatylli ban kyrpad ïa ka sorkar ba kan pynpaw shai la kan ai kyrdan ST ïa ki hynriew tylli ki jaidbynriew ne em. Ka sorkar kam shym la lah ban ai ïa ka jubab kaba shai. Dei na kata ka daw ba ngi la mih jyndat noh na Assembly,” bynrap biang u Gogoi.

Katba u MLA ka BJP na Raha konstitwensi ka Sashi Kanta Das ka la pynpaw ka jingkyrshan ia kane ka jingdawa katba ka pynpaw ka jingshaniah ha ka sorkar jylla.

“Nga kyrshan ia ka jingdawa ban ai ia ka kyrdan Scheduled Tribe sha ki 6 tylli ki jaidbynriew. Bun ki briew ki kylli balei kam pat urlong haduh mynta.Nga ngeit skhem ba ka kam kaba dang iaid hapoh ka jingialam u Myntri Rangbah ka jylla u Dr. Himanta Biswa Sarma kan long kaba pura, bad ka jingkular kan urlong,” la ong ka Das.