Dawa ka HYC ia ka jingkhynra droks kaba mardor ha ki jaka ba jyllei drok ka Shillong

Shillong, Naitung 10: Ka Hynniewtrep Youth’ Council (HYC) ka la dawa ban pyntreikam mardor ïa ka Special Anti-Drug Enforcement ban ïakhun pyrshah ïa u drok ha baroh ki jaka ba la ithuh kum ki jaka ba jyllei drok ha nongbah Shillong, da kaba kdew ïa ka jingma kaba jur bha jong u drok iaka imlang sahlang.

Ha ka kyrwoh, u president ka HYC Bah Roy Kupar Synrem u la dawa ba ki pulit ki dei ban iaid pahara man ka por ha ki jaka ba jyllei drok, ban leh tyngeh ia ki nongkhaii drok, bad ban don daka Plan kaba shai ban pynshngain biang ia ki jaka paidbah na u drok bad naki kam runar.

Ka HYC ka la pynrem jur daka ba kynnoh ba ka jingbym leh eiei ka Sorkar kala pynjyllei iaka kam khaii drok ha Shillong, khamtam ha Police Bazar, GS Road, Lum Survey bad ki jaka ba marjan ha kaba la ïathuh ba ki nongdih bad ki nongkhaii drok ki pyniaid iaka kam beian khlem jingtieng iaka ain ne ia ki paidbah.

“Ka khubor ba dang shen bala paw haki lad pathai khubor kaba pynpaw kumno ki jaka khaii pateng ki shah pynthut, ki nongthied ki shah beh, bad ki jaka paidbah ki kylla long ki jaka dih drok bad ki kam pyrshah iaka imlang sahlang bad kane kala kylla long ka jingmaham kaba jur ba ka jinglong jingman ha Shillong ka la don jingma” ong ka HYC.

Ka HYC ka la kynnoh ba ki nongkhaii, ki nongdie jingdie, ki kynthei, ki khynnah bad ki nongshong shnong ki shah pynbor ban im bad trei hapoh ka jingtieng katba ka Sorkar ka dang iai bteng ban long kum ka nongpeitkai kaba sngap jar.

“Ka jingpyndonkam paidbah ia ki drok haba shit ba shai, ka jingdon jong ki nongdih drok ha khmat ki dukan bad ki jaka khaii, bad ka jingshah pyndik, jingshah tuh bad jingshah pyntieng pynsmiej ba la iathuh da ki nongdie dukan kiba iakynduh man ka sngi, ka pyni shai ba kane kam dei shuh ka jingeh kaba ha rieh hynrei ka dei ka jingeh kaba pyni baka nongbah ka don hapdeng ka jingbym don ain” ong ka HYC.

Da kynthoh ba ka Sorkar Jylla, ka tnad kam poh iing bad ki bor ka ain ki dei ban shim iaka jingkitkhlieh ba ki ailad ia kane ka jingma ban saphriang khlem da peit bniah, ka HYC ka la ong ba ka jingbym lah ban tehlakam ia ki jaka ba la tip kum ki jaka ba jyllei drok ka pyni baka Sorkar kam don jijgkitkhlieh ban weng ia kine ki jingeh kiba mih namar ba jyllei u drok.