Nongstoin, Naitung 09: Ka Ophis u Range Forest Officer ka Mairang Range, ka la leit khang ia ki jaka tih syiap bad ki karkhana otdieng be-ain kiba don ha Mairang, Eastern West Khasi Hills.
Ia kine ki jaka tih shyiap bad ki karkhana dieng la khang khyrdep ha ka jingkhynra bala pynlong ha ka sngi Balang ha sor mairang ryngkat ka jingiatreilang bad ka Tnad Pulit ka District.
La pynlong ia kane ka jingkhynra hadien ka jingioh khubor ia ka jingjyllei ka kam khaii bad shalan dieng bad ka jingioh pdiang ruh ia ki jingujor na ki kynhun bapher bapher.
Ha ka jingkhynra, la lap ba katto katne ki karkhana ot dieng ki treikam khlem ka jingbit ne ki kot ki sla kiba biang na ka bor ba dei peit. La kurup ia bun bah ki dieng bad ia ki mashin kiba heh kiba pyndonkam ha ki karkhana ot dieng. Hadien kane la pyndait tala bad tah mohor da ka tnat Khlaw kum ka dak ba kine ki karkhana la khang khyrdep.
Lah ban pynkynmaw ba naduh ka 15 tarik Jymmang 2026 ter ter, ka Ophis jong ka Range ha ryngkat ki bor synshar District, ki la pynlong ruh ia ka jingleit jurip bad khynra halor ka jingtih shyiap beain ha ki thain Mairang.
Ïa kane ka jingjurip la pynlong hadien ka jingujor na ki khlieh nongsynshar bad ki kynhun bapher bapher ha kaba ïadei bad ka jingkhaii beaiñ ia u shyiap khlem da ioh jingbit na ki bor pyniaid jong ka District.
Ha kane ka jingjurip, la lap ba ki don katto katne ki jaka tih shyiap kiba pyntreikam khlem ka jingbit na ki bor ba dei khmih. Mar mar hi la pynsangeh noh ia ki par shyiap beain bad la kurup noh ia ki tiar ba pyn donkam ban tih shyiap, nangta la kurup ruh ia u shyiap ba la dep ban lum thup ha ka por ba pynlong ia ka jingjurip.
U Range Forest Officer bah B. M. Kharkongor u la pyntip ba ïa kum kine ki jingkhynra bad jurip la ju leh na ka por sha ka por bad yn dang ïai bteng ban leh nangne shakhmat, ban tehlakam bad khanglad ïa ka jingpyntrei dieng bad tih shyiap beaiñ hapoh ka District.
U la pynshai ba ka tnad kam pyrshah ia ka khaii dieng ne shyiap, hynrei baroh ki kam ki dei ban long kat kum ki kyndon ain ba la buh da ka sorkar. U la bynrap ruh ba ki dieng bad u shyiap ki dei ki marpoh khyndew kiba kongsan na ka bynta ka khaii pateng hapoh ka District bad ka tnat ka tip bha ïa kane.
