Shillong, Naitung 09: Ka Hills State People’s Democratic Party (HSPDP) ka ai khublei ia ka Sorkar synroplang ka MDA bad ia u Myntri Rangbah ka Jylla u Conrad K Sangma namar ka jingsdang ia ka wat kaba ar jong ka jingiakren pynbeit ia ka jingiakajia pud hapdeng ka Meghalaya bad Assam kaba la sahteng la slem bha.
U President ka HSPDP u Bah KP Pangniang u la ong ba ka Party kaba don lang bad Sorkar MDA naka por shaka por ka la iai pynbor iaka Sorkar ban iapynbeit noh ia u pud u sam bad ka ju iai pynpaw ia ka jingkyrmen ba ka wat kaba ar jong ka jingkren kan sdnag noh.
“Ka HSPDP, ka ai khublei ia u Myntri Rangbah ka Jylla, uba la shim ia ka sienjam ban pynbeit noh ia u pud u sam hapdeng ka Meghalaya bad ka Assam, kaba la sahteng la slem bha. Mynta ngi la iaid sha ka wat kaba ar jong ka jingiakren pynbeit pud” la ong u Bah Pangniang.
U Bah Pangniang ula pdiang sngewbha ia ki kyndon iakren lane ki terms of reference ba la mynjur lang da baroh ar tylli ki Jylla, kiba la pynshong nongrim ha ki 5 tylli ki nongrim ba kongsan-ka ingpynbeit kan long katkum ka histori, ka jaitbynriew kiba shong shnong ha ka thaiñ, ka jingsngew jong ki briew kiba sah ha ka thaiñ, bad ka jingsuk ha ka liang ka synshar khadar.
Da kaba don kine ki nongrim, kan kham suk ban pynbeit ïa ki hynriew tylli ki Sector kiba dang sah. “Kum u dkhot jong ka West Khasi Hills Regional Committee, u bah Pangniang u la ong ba u kyrmen ba shen ka Regional Committee kaba la khlieh da u Chairman u Bah Metbah Lyngdoh kan sa pynlong noh ïa ka jingïakren bad ka Regional Committee Kamrup District ka Jylla Assam.
U la kdew ruh ia ka bynta jong ka Langpih, kaba long kaba jyrwit jyrwat bha hynrei ula pynpaw ba ia kane ruh sa lah ban pynbeit.
