Imphal, Naitung 10: Ka kynhun ki pulit ka Manipur, ka National Investigation Agency (NIA) bad ki pulit ka Central Reserve Police Force (CRPF) ha ka sngi Thohdieng ki la kem ia arngut ki briew ha kaba iadei bad ka jingshah pyniap jong ki 6 ngut ki Naga ha ka shnong Leilon Vaiphei ha kaba sdang jong une u snem.
Da kaba bud ryntih katkum ki jingtip na ki tnad syntiat, ki bor pahara ki la pynlong ïa ka jingïatreilang bad khynra ha ka por mynstep ha ka shnong Leilon Vaiphei ban kem ïa ki nongshah kynnoh ba ki donkti ha ki kam pynïap briew ha ka 13 tarik u Jymmang, 2026.
Kitei ki arngut kiba la shah kem ki dei kiba la tip kyrteng kum u Pradip u khun jong u Tomba bad ka kurim jong u ka Ayingbi baroh arngut ki dei kiba shong ba sah ha ka shnong Leilon Vaiphei.
Ka Naga Students’ Federation (NSF) ha ka sngi Palei ka la aiti ïa ka dorkhas sha ka President Droupadi Murmu ban pan jingïarap kyrkieh ban pynthikna ïa ka hok na ka bynta ki 6 ngut ki Naga kiba la shah rahbor bad shah pynïap ha Manipur bad dawa ban bishar bniah ïa ka jinglong jingman jong ka jingïada ha ka jingïakynad jong ka jylla.
Ia katei ka dorkhas, kaba la pynpoi lyngba u Lat ka Nagaland, la aiti ha ka jingthang mombiti ha Kohima, kaba la pynlong kum ka jingkynmaw ia ki 6 ngut ki riew paidbah ka Liangmai Naga, kiba la ioh tam ia ki met iap jong ki, ha u bnai Jylliew, hadien ba la kynnoh ba ki la shah rahbor na ka shnong Leilon Vaiphei kaba hap hapoh ka Kangpokpi district.
Napdeng ki jingdawa ba kongsan, ka NSF ka la khot ia ka jingtohkit kaba laitluid, kaba khlem liang bad kaba la buh por halor ka jingshah rahbor bad pyniap ia ki hynriew ngut ki riew paidbah Naga, ka jingtohkit kaba bniah halor ki jingshah thombor ia ki riew paidbah, ka jingbishar bniah ia ka jingiateh Suspension of Operations (SoO), ka jingtohkit ia ka jingpynlong ia ki kam ban pynkhlain ka jingiada ia ki shnong Naga bad ban leh pyrshah ia ka jingrep poppy beain, ka jingkhaii drok bad ki tiar ialeh beain.
Ka federation ka la wad ruh ïa ki lad ki lynti ban pynthikna ïa ka jingïaid lynti kaba shngaiñ bad kaba khlem jingkhang jong ki riew paidbah ha shilynter ka surok National Highway-202 bad kiwei kiwei ki lynti ba kongsan.
Da kaba pynpaw ba ka suk ka sain kaba neh ka lah ban ioh tang lyngba ka jingiakren, ka hok bad ka jingkitkhlieh, ka NSF ka la kyntu ia ka sorkar kmie ban shim ia ki sienjam kiba don jingmut ban pynioh biang ia ka jingshaniah jong ki paidbah bad ban iada ia ka hok bad ka burom jong baroh ki jaidbynriew kiba shah ktah ha Manipur.
 bad ki pulit ka Central Reserve Police Force (CRPF) ha ka sngi Thohdieng ki la kem ia arngut ki briew ha kaba iadei bad ka jingshah pyniap jong ki 6 ngut ki Naga ha ka shnong Leilon Vaiphei ha kaba sdang jong une u snem.){kind=link}