Shillong, Naitung 10: Ki nongshong die madan kiba don hapoh ka shatri jong ka Meghalaya & Greater Shillong Progressive Hawkers and Street Vendors Association (MGSPHSVA) hynne ka step ki la tur paidbah hakhmat ka ophis Shillong Municipal Boards (SMB) ban dawa thaw noh ia ka Town Vending Committee (TVC) kaba pura.
Ki nongshong dukan madan kila daw aba dei ban pynlong da ka elekshon ban jied ia ki nongkitkam ka TVC ba pura khnang ba ki kam ki jam kin iaid beit haba iadei bad ka jingthmu ban pynkynriah ia ki nongshong dukan madan na ki thain Motphran, GS Road, Jail Road bad Khyndai Lad.
Haba kren shaki lad pathai khubor u Assistant General Secretary ka MGSPHSVA Bah Shane Thabah u ba dei ruh u dkhot ka PTVC ula ong ba baroh ki tip ba la thaw iaka Provisional Town Vending Committee bad katkum ka ain ka jingtreikam jong ka PVTC ka iap noh tang hadien shi snem naduh bala thaw iaka.
U Bah Shane ula ong ba kum u dkhot ka PVTC u ju iohi ba ka Committee kum ju shim kyllum lem iaka rai jong baroh hynrei la rai tang uwei u briew uba heh duh jong ka PVTC bad kane ka long beain katkum ka ain.
Ula kynnoh ba iaka PTVC la shu thaw khlem da don kano kano ka elekshon bad dei namar kane, ka PVTC ka treikam bad ka shim rai katba mon khlem da pyrkhat iaka hok jong ki nongdie madan.
“Ngi dawa naka Ophis SMB ban thaw noh ia ka TVC ba pura daka ba pynlong elekshon bad ban pyntreikam ruh kat kum ki kyndon jong ka ain haba pynkynriah iaki nongdie madan” ong u Bah Shane.
U Bah Shane ula batai ba haka por iakren iaka mat pynkynriah iaki nongdie madan na Laitumkhrah, ka PVTC kala iakren bad kala leit jurip bad ki bor shnong iaki jaka bala ithuh ban ai jaka iaki nongdie madan. “Watla ka jaka kam pat biang hynrei ngi ong mynjur namar ngim dei ki briew kiba ia mih ban pynkulmar shnong hynrei ban iatrei kam lem bad ki briew jong ka Sorkar, bad ka ain” ula ong.
“Watla ngim pat hun iaki jaka hynrei ngi la ong to ngin ia pyrshang hynrei hadien katto katne sngi, ia kato ka jaka ruh kila shu rai hi maki bad kila pynsangeh noh ba katei ka jaka kam dei shuh ka jaka shong die jingdie madan” ula ong.
Halor ka jaka shong die madan ha MTC, u nongialam ka MGSPHSVA ula iathuh ba haka PTVC la iakren ban nym pyniakhleh jaktung iaki ba die jingbam, jain ban kiwei ki mar pyut haka juh ka jaka.
“Haka por ba ngi iakren ki ong ba kin pynkynriah sha SMB Parking Lot, ngi la iakren ban pynkynriah noh iaki ba die bam hynrei haka por ba ai COV, wat iaki ba die jain ruh khlem da iakren haka Committee, la shu rai beit nangne na Municipal Office ban pynshong lang hajuh bad kiba die jingbam, jhur bad kiwei kiwei khamtam kiba mar pyut” ula ong.
“Kane ka pyni ba kim burom wat iaka Committee kaba la don, te mynta hangne ngi wan ban dawa ba dei ban pyntreikam noh iaka Town Vending Committee ba pura bad ban pynlong daka election khnang ba ka kam ka jam haba iadei bad ki nongdie madan kan nym don ka jingiashah liang bad kan iaid beit” ula ong.
Haba iadei bad ka jingkynnoh ba ka Sorkar ka thmu ban pynkynriah iaki ba die jingdie naki thain Iewduh, Iew Mawlong, Motphran, u nongialam ka MGSPHSVA ula ong ba ka ain ka don ba ym shah ban pynduh iaki Iew kiba la don naduh ki por mynshwa.
“Ka Iewduh, ka Iew Mawlong, Motphran ter ter ka dei ka Iew kaba la don lypa la bun bun snem naduh hyndai hynthai iaka ba la tip kum ka Heritage Market ne Natural Market bad ka ain ka batai shai ba phim lah ban pynduh ia kum kita ki Iew” ula ong.
