Shillong, Naitung 10 : Ka Sorkar Meghalaya ha ka sngi Thohdieng, kala pynbna be-ain ia ki kyrdop lum khajna jong ka Khasi Hills Autonomous District Council (KHADC) ba ialam da ka Voice of the People Party (VPP) na ki jingrung ki jingri jingdup ha Meghalaya.
Ia kane la pynbna da u Myntri ka Tnad Animal Husbandry & Veterinary Bah Sanbor Shullai haba pyntip ba ka Tnad kala bthah ia ka KHADC ba kan khang noh ia ki.
U Bah Sanbor u iathuh ba ka Sorkar kala ioh pdiang ia ki jingujor ba iadei bad ki work order bala ai da ka KHADC sha u Francis L Nongbri ba na Mawlai Nongkwar ba un pynieng ia ka khyrdop lum khajna na ki jingri jingdup (masi, sniang, blang, syiar, ha ka thain Byrnihat.
“Nga la phah ia ki work order sha ki Ophisar ba kin bishar la kine ki hukum ki long kiba shongain ne kiba be-ain” iathuh u Bah Sanbor.
Hadien kane, ka Tnad kala thoh sha ka Tnad District Council Affairs (DCA) ha ka 30 tarik Jylliew, haba phah ruh ia ka hukum ka KHADC ba 1 tarik Jylliew ba shah ban pynieng ia ka khyrdop ban lum khajna na ki kali kiba kit ia ki jingri jingdup ha 19th Mile, Byrnihat na ka bynta u snem 2026-27.
Ha ka shithi, u Under Secretary P Lyngdoh ula pynpaw “La bthah ia phi ban sngewbha pyntip sha ka KHADC bad kiwei ki Autonomous District Council (ADC) jong ka Jylla ba ka jinglum khajna ia ka jingrung ki jingri jingdup ka dei ka bym shah satia”.
“Kumta, ka long kaba beain. Ngi la phah ia ka shithi na ka Tnad ban nym shah ia ka District Council ba kan lum ia ka khajna na ka jingwanrah ia ki jingri jingdup” ong u Bah Sanbor.
U Myntri ula bynta ba la bthah ia baroh lai tylli ki ADC ba kim dei ban lum khajna ia ka jingwanrah ia ki jingri jingdup shapoh ka Jylla.
