Shillong, Naitung 08 : Ka kynhun Myntri ka Sorkar Jylla kala ai jingmynjur ia ka jingtyrwa ban ai 50 acre ka jaka ha Mawkhanu sha ka St. Xavier’s University ba kan seng iala ka campud hajan Shillong.
Haba pynbna ia kane hadien ba dep pyniaid ia ka jingialang ha ka sngi Balang, u Myntri Rangbah Conrad K Sangma ula ong ba kane ka rai kala mih hadien ka jingiatai bala iaid da ki snem naduh ba ka Jylla kala mynjur ia ka Act jong ka University.
“(Ngi la ai jingmynjur) ban seng ia ka St.Xavier’s University ha Shillong” ula ong.
Kat kum ka jingong u CM, ki bor pyniaid ka University kila pan 100 acrea ka jaka na ka Sorkar Jylla.
“Ha ka jingpyniaid kam, kila don shibun ki jingiakrren bad ki jingiapynbeit kila la jia. Khatduh, ngi la ioh pdiang ia ka shithi na ki bor pyniaid ka St Xavier ba ki donkam 100 acrea ka jaka na ka Sorkar ba kan pynieng ia ka University” ong u Conrad.
Ka kynhun Myntri, hadien ka jingiathir kaba sani, ala mynjur ban ai shiteng na ka jaka bala kyrpad ha ka dor kaba jem.
“Hadien ka jingiathir kaba sani, ngi la rai kum ka kynhun Myntri ba ngi lah ban ai 50 acre jaka ha Mawkhanu ha ka dor ba T. 1 lak ha ka shi hectare” ula iathuh.
U Conrad ula ong ba ka Sorkar ka khmih ia kane ka project kum ka jingkynshew kaba bun bun snem ha ka pule dangle bad ka jingpynroi ia ki samla.
“Ia kane la leh namar ka St.Xavier’s ka dei ka jaka pule kaba la paw nam bha. Kane ka dei ka jingkyn shew ba ngi la leh na ka bynta ki samla bad ki pateng ban nang wan” ula ong.
