Shillong, Naitung 8: Ka Sorkar Meghalaya ka dang kyntur ban tei ia ki jaka theh niut kat kum ka juk saian (Scientific Landfills) ha man la ki district headquarter bad ki kam ki dang iaid shakhmat ha Nongpoh bad la pyniaid ruh shakhmat ia ki jingtyrwa ha Jowai, Tura, Williamnagar, Nongstoin bad Khliehriat, ong u Symbud Myntri Rangbah uba khmih ia ka Urban Affairs u Bah Sniawbhalang Dhar hynne ka sngi Balang.
U Bah Dhar ula ong, ba ka Tnad Urban Affairs kala bthah ia baroh ki CEO ha ki district bad ia ki MLA ba kin iatreilang ban ithuh ia ki jaka kiba biang na ka bynta ban tei ia ka jaka lum niut ha ki thain ki jongki.
“Na ka bynta ka Tnad Urban Affairs, nga lah dep ban bthah ia baroh ki Chief Executive Officer bad ia baroh ki MLA kiba hap hapoh jongka Williamnagar, Jowai, Tura, Nongpoh bad kiwei kiwei” ong u Bah Dhar haba iakren bad ki nongthoh khubor.
U Symbud Myntri Rangbah ula ong, ba ka jylla kala bhah ia ka pisa na ka bynta ka Ri-Bhoi bad ka jingtrei ka lah sdang.
“Nga dap da ka jingkmen ban pyntip ba ia ka Nongpoh Landfill, ngi lah dep ban bhah ia ka T.5.80 Klur bad ka kam mynta kala sdang ban iaid shakhmat” ula ong.
“Ngin leit mynta sha ka thain Nongstoin, Williamnagar, Tura bad Khliehriat ruh. Nga lah dep ban bthah ia ki ophisar ki jong nga ba kin iatreilang ryngkat. Kan bha shibun ban don ia ki Landfill ha man la ki nongbah bad ki jaka sor”.
Ha kaba iadei bad ka jingsahteng jong ka Landfill na ka bynta ka Shillong ha Nonghali, u Bah Dhar ula ong, ba lah dep ban pynkhreh ia ka jingtyrwa hynrei kala sahkut noh shwa namar ba ka la don ka jingujor mukotduma.
“Ha ka jingshisha, ngi lah long kiba kloi ban shim ia ka rai halor katei. Ka long pat kaba sngewsih ba uwei na ki nongshong shnong ula leit ujor sha ka iingkashari. Kumta kala don noh ka jingmih jong ka jingsngewkhia halor katei ka mat bad namar kane kala sahkut noh ha kaba iadei bad ka Nonghali. Kumta ngi hap ban ap shwa ia katei” ula ong.
Haba kylli ia jingiada ia ka mariang, u Bah Dhar ula ong, “Baroh ki jingsngewkhia yn sa shimkhia da ki aiñ kiba iadei bad ka jingpynjaboh ia ka mariang”
Na ka bynta ka Jowai, u Bah Dhar ula ong, ba ki kam ki jam kidei kiba lah jan dep lut artad bad ka Tnad ka dang trei ia ki kam ban ioh ia ki jingbit kiba kongsan bad kiba donkam.
“Mynta ngi dang pynkhreh ia baroh ki jingdonkam na ki tnad ki bapher bapher. Kaba nyngkong eh, ngi dei ban ioh ia ka NOC na ki shnong bapher bapher ne na ka Elaka kaba kitei ki jaka ki hap. Hadien katei, ngi hap ban ioh ia ka jingbit na ka Pollution Board. Hadien ba la pyndep ia kiei kiei baroh ngin sa pynlong ia ka
Public Hearing” ula ong.
Ula bynrap, ba kila don ruh sa 3-4 tylli ki jaka kiba biang kiba lah dep ban ithuh hynrei ia ki jaka kiba biang tam yn sa pynbna hadien ba la dep ban pynlong ia ka jingkhmih kaba bniah bad hadien ba lah dep ban iasyllok bad ki paitbah ban lait na kano kano ka kynrum kynram.
“Ngi lah dep ban ithuh 3-4 tylli ki jaka hynrei ngin sa nang pynthikna kaei kaba biang tam. Ngam kwah ban iathuh haei ki don namar ba bun ki briew ki kwah ban pyrshah. Ngin hap ban ia ap shwa. Khatduh eh kin sa tip hadien ba ngi lah dep pynlong ia ka Public Hearing,” ong u Dhar.
U Symbud Myntri Rangbah ula banjur ba baroh ki jingtei kiba thymmai kin hap ban iaid bad bud ryntih ia ki kyndon jingbthah jong ka ri.
“Baroh ki Landfill kiba la tyrwa kin dei katkum ka jingstad saïan ne Scientific, lem kumta ka NGT kan ym shah” ula ong.
