Shillong, Naitung 8: U Symbud Myntri Rangbah uba khmih ia ka Urban Affairs hynne ka sngi Balang, ula ong ba ka Sorkar Jylla kam pat rai ia ka jaka kaba pura na ka bynta ban pynkynriah ia ki nongdie madan ha Shillong.
U Bah Sniawbhalang Dhar ula ong ba ia ka rai ban pynkynriah ia ki nongdie madan ha Laitumkhrah kadei kaba la khmih lynti ha kine ki sngi ban wan, katba ka kam ka dang iaid shakhmat ban ithuh ia ki jaka kiba biang ha kiwei pat ki bynta jong ka sor.
“Ngim pat lah ban pynthikna ia ka jaka kaba pura. Lehse ha kine ki sngi kiban wan, ngin sa lah ban pynthikna na ka bynta ka thaiñ Laitumkhrah,” ong u Bah Dhar haba iakren bad ki nongthoh khubor.
Ula bynrap ba ia ka jingdon baroh ki nongdie madan na ka bynta ban pynkynriah kadei ka kam kaba dang don hapoh ka jingpynkhreh.
“Na ka bynta kiwei pat ki bynta jong ka nongbah, ngi dang don ha ka lynti ban ithuh ia ki jaka. Ngim pat ioh pura katno tylli ki jaka ki don ia kaba ngin lah ban pyniaid shakhmat” ula ong.
U Symbud Myntri Rangbah ula ong, ba ka jingpynkynriah yn pyniaid da ki wat, da kaba pynleit jingmut ia ki jaka kiba mad ia ka jingkhapngiah kaba jur.
“Ngi ngin sa iaid da ki wat bad ngin sa leh ha baroh ki jaka kiba la shlei da ki paitbah” ong u Bah Dhar.
