Shillong, Naitung 08 : U Myntri Rangbah Conrad K Sangma ha ka sngi Balang ula ban biang ba ka Sorkar Jylla kam kyrshan satia ia ka jingtih Uranium ha Meghalaya bad ban jur ba ka ktien jong u kum u CM ka dei ban shim kum ka nongrim ba khatduh jong ka Sorkar halor kane ka kam.
Kane ka jingkynthoh kala mih haba jubab ia ka jingkylli halor ka jingkynnoh ba hiar ki Heh ka Atomic Minerals Directorate (AMD) sha ki jaka ba don Uranium ha West Khasi Hills, kynthup ka shnong Domiasiat, wat hapdeng ka rai jong ka Sorkar ha u snem 2009, ban khein iap ia ka rai jong ka Kynhun Myntri halor ka jingtih Uranium.
“Ha man ki jingkren jong ka sha ki lad pathai khubor bad wat haba kut u 2025, Nga kynmaw ba nga ong shai bha ia kane ba ngim kyrshan satia ia ka jingtih uranium. Ngi la kren shai halor kane bad ngi la kren shai sha ka Sorkar India ruh. Ngi la kren shai sha ki paidbah ruh” ong u Conrad.
U Myntri Rangbah ula ong ba ka lynti treikam ka Sorkar ka long ban tei ia ka jingmynjur lang bad ym ban pynjari ia ki rai ha u paidbah.
“Kam dei satia tang ka kam tih uranium. Lada phi peit ia baroh ki rai ba ngi la shim, khamtam ki rai kiban ktah ia u paidbah ba bun balang, ngi la kren shai ban gin trei bad leh ia ki kam kiba iahap bad kaei kaba bha tam na ka bynta ki briew jong ngi” ula ong.
Haba kdew ia ka lynti rel kum ka nuksa, ula bynrap “Lada phi iakren ia ka lynti rel, ngi lah ban dei tang ma ngi ba haduh mynta ngim pat don ia ka lynti rel ban iasoh bad ka Nongbah lane ki thain kiba heh jong ka Jylla. Ka dei ka jingeh kaba khraw hynrei ngim lah ban shu leh da ka bor. Ngi la kren shai ba ngi dei ban shim lang ia ka jingmynjur u paidbah haba ngi pyniaid shakhmat ia kane ka kam” ong u Conrad haba ong ba ka kam tih uranium kala mih la bun sien bad la kyntait ruh man ka por ba ka mih.
Halor ka jingkynnoh ka KSU ba ki Heh ka AMD kila hiar man ka por sha Domiasiat bad kiwei ki jaka, u Conrad ula ong ba um pat ioh jingtip ia kum kane ka jinghiar hynrei ula kular ba un sa leh eiei ynda la lah an pynthikna.
“Halor ka leit ka wan ki briew kiba rung bad ba mih, kane ka dei ka kam…lada kano kano ka jingtip ka wan sha ka Ophis jong nga, lada phi pyntip ia nga khlem pep ngin leh ia kaba donkam. Ngam don satia ia ka rung ka mih ki briew hynrei mynta ba phi la iathuh ia nga, Ngan sa wad jingtip bad ngin sa shim ia ka sienjam kaba donkam” ula ong.
Haba kylli la ka Sorkar kan pyrkhat ban mynjur noh da ka Resolution ha Iingdorbar Thaw Ain ban pynskhem ia ka nongrim, u Conrad ula ong ba ka jingkren jong u hi ka dei kaba khia thew bha.
