Dawa ka HNLC ia ka EC ka VPP ban weng noh ia ka Land Bill ka KHADC

Ka jingkam u Bah Ardent ba 76% kim don jaka ka dei kaba ialam bakla

Shillong, Naitung 01 : Ka Hynniewtrep National Liberation Council (HNLC) ha ka sngi Thohdieng kala dawa ia ka Executive Committee ka VPP ha Khasi Hills Autonomous District Council (KHADC) ba kan weng noh (withdraw) ia ka Khasi Hills Autonomous District (Regulation and Administration of Land) (Amendment) Bill, 2026, da kaba shim ba ka jingpynksan jong u President ka VPP Ardent Miller Basaiawmoit ka dei kaba “ialam bakla”.

“Ka HNLC namar kata ka dawa ia ka Executive Committee ba kan weng noh mardor ia ka Khasi Hills Autonomous District (Regulation and Administration of Land) (Amendment) Bill, 2026,” ong u General Secretary ka HNLC Bah Sainkupar Nongtraw ha ka kyrwoh.

“Lada jia ba ka Executive Committee ka kyntait ban leh ia kane, u Lat ka Meghalaya u dei ban sangeh shuwa ban ai ia ka jingmynjur khnang ban iada ia ka hok longtrai halor ka khyndew ka shyiap bala pynkupbor hapoh ka Sixth Schedule” ula ong.

Haba kyntait ban pdiang ia ka jingshaniah u Bah Ardent ha ka Socio Economic and Caste Census (SECC) 2011, u Bah Sainkular ula ong “Da kaba shaniah ha ka Socio Economic and Caste Census (SECC) 2011, kaba kam ba kumba 76% ki longiing ha Meghalaya kim don satia iala ka jong ka jaka, u kwah ban pynksan ia ka jingknieh noh ia ka bor treikam kat kum ka riti ka dustur jong ki Dorbar Shnong bad Hima haba pynleit jingmut ban ai ia ka bor ka bym pat ju don mynno mynno ruh ha ka Executive Committee (EC)”.

“Kane kam dei satia ka Land reform (jingpynkylla ia ka hok halor ka khyndew ka shyiap) ba shisha. Ka dei ka jingwanrah ha kawei ka bor ban pyniaid ia ka khyndew ka shyiap hapoh ka nam ban weng ia ka jingbym don jaka puta ki longiing” ula ong.

Ka HNLC kala ong ba ka jingkhein jong ka samari SECC kam lah ban pynksan ia ka jingthaw ain ba kyrpang jong ka ri-lum Khasi.

“Ka jingpynksan ka iap noh haba iakhmih bniah bha ia ka. Ka jingkam bala pynphriang khubor bha ba 76% ki longiing kim don satia iala ka jong ka jaka shimet ka dei ka jingkhein jong ka Jylla Meghalaya baroh kawei kaba kynthup ia ka Khasi, Jaintia bad ri-lum Garo. Wat hapdeng kane, ka Amendment ka treikam tang hapoh ka Khasi Hills Autonomous District Council” ong u Bah Sainkupar.

Ula ong “Lada kane ka jingkam bym don jaka ka dei ka jingeh hapoh ka Jylla baroh kawei, balei tang ha Khasi Hills la shah pynhap ha kane ka jingpynkynriah naphang ia ka bor halor ka khyndew ka shyiap? Ula ong. “Ka samari jong ka Jylla baroh kawei kam lah ban long ka jingpynksan ia ka ain ba kyrpang tang jong ka Khasi Hills”.

U Bah Sainkupar ula ong ba u Bah Ardent Miller Basaiawmoit, kum u MLA, u dei ban kren ia kane ka mat hapoh ka Iingdorbar Thaw Ain ka Jylla, ym lyngba ka KHADC.

“Lada u Ardent Miller Basaiawmoit u kwah ban pynksan ia ka samari 76% kum u MLA, kane ka dei ka kam hapoh ka Iingdorbar Thaw Ain ka Jylla. Um dei satia u dkhot ka KHADC lane u MDC. Ka dei ia ki MDC ka KHADC ba kin shong bishar ia ki sakhi ha ka jaka ban shu shim ia ka samari jong ka Jylla baroh kawei khlem da pan shuwa ia ki jingkhein ba dei thik tang jong ka Khasi Hills” ula kynthoh.

Haba shim ia ka jingkam ba 76^ ki dei ki bym don la ka jong kum ka jingialam baha, ka HNLC kala ong “Hapoh ka rukom treikam kat kum ka riti ka dustur u Hynniewtrep, ka jingbym don ki briew ia ka title deed kam mut satia ba une u briew u dei u bym don jaka”.

“Da ki pateng ki briew jong ngi kila im, rep bad ioh pateng ia ki jaka jong ki Raid bad Hima lyngba ki bor treikam tynrai bad ka hok longtrai jong ki shnong ki thaw ha ka jaka jong ka jingai kyrteng shimet kum ha ka rukom synshar ki dohlieh” ong u Bah Sainkupar.

Ula buh jingkylli ia ka jingmut jong kane ka jingkhein : “Lada 76 % ki longiing ha Meghalaya ki dei shisha kibym don jaka, ka dei ia kaban kylli balei ba 88.5% na ki longiing ha Nongkyndong ha kane ka jylla ki don ia ki Iing ba ki sah. Ka Longiing kam lah ban tei iala ka jong ka Iing ha ka jaka ba kam long trai”.

“Ka SECC ka dei kaba pynwandur ban thew ia ki hok longtrai ia ki khyndew ki shyiap jong ki riew shimet, ka rukom leh ki bor synshar dohlieh ka bym shym la shna ban ithuh ia ki jaka ki Raid, Hima lane ki Shnong kum ka dur jong ka jinglong trai” ula ong.

“U Ardent Miller Basaiamoit ula pyndonkam ia kane ka jingduna kum ka jingpynksan ban pynpra ia ki bor treikam tynrai kiba ka census kam lah ban iohi” ong u Bah Sainkupar haba kynthoh ba kane ka Amendment ka weng noh ia ki jingiada kat kum ka riti dustur.

“Hapoh kane ka ain ba mynta, ka kyndon 16 ka ong ba donkam ia ka Executive Committee ban iasyllok bad ki Dorbar Shnong, Dorbar Raid bad Dorbar Hima shuwa ban pynmih ia kano kano ka jingpynbna (notification). Ka amendment kala weng noh ia ka jingdonkam ban iasyllok bad pyntlot ia ka bor iada jong ki bor treikam tynrai” ula ong. “Ban shu aiti lut ia ka bor ha kawei ka jaka ban weng ia ki jingeh ia ka jingpyniaid kawei ka bor ka dei kaba long khlieh khlieh tdong tdong” ula ong.

“Lada kawei ka tala jingkhang ka don ia u shabi uba sniew, phim aiti noh ia u master key sha uwei u briew bad ong ba dei na ka bynta ka jingshngain. Phi shna pynbha ia ka tala” ula ong “Kane ka dei kaei kaba ka Bill ka leh. Ka shimti ia ka jingeh jong ka jingkitkhlieh bad jubab da ka jingeh jong ka bor” ula ong.

Haba kyntu ia ki Khlieh Nongsynshar ban ialum land, ula ong “Man ki Hima, man ki Syiem, man ki Daloi, man ki Wahadadar, man ki Sordar bad man ki Rangbah Shnong ki dei ban ieng tylli, kham kongsan eh, iatylli ban iada ia ka khyndew ka shyiap ki kpa tynmen bad ki bor treikam tynrai”.

“The KHADC Land Amendment Bill, 2026, kam weng satia ia ki daw ba shisha halor ka jingbym shngain ka khyndew ka shyiap” ula ong.