Shillong, Naitung 03: Haba pynpaw ka jingsngew khia halor ka jingpyntreikam iaka Special Intensive Revision (SIR) jong ka Electoral Roll, ka Khun Hynniewtrep National Awakening Movement (KHNAM) ka la iathuh ba kan sa thoh sha u Chief Electoral Officer (CEO) ban dawa pyrrkhing bha ia ki jingpynshisha ban pynthikna ba ki riewlum trai muluk kin nym shah kyntait ha ka Electoral Roll.
“Ngi la pule bniah ïa ki kyndon jong ka SIR , bad hooid, ngin pynpaw ïa ka jingsngewkhia lada don ka jingshah weng ne shah kyntait ki trai Jylla haka Electoral Roll” ong u Working President ka KHNAM Bah Thomas Passah.
U Bah Thomas ula kdew ba ka jingpyntreikam iaka SIR la leh katkum ka thup kyrteng thep vote jong u snem 2005. “Ha kaba kut iaka SIR la pynshong nongrim katkum ka thup kyrteng thep vote 2005. Ki shim ia ki jingtip naka jinglum jingtip kaba khatduh kaba la pynlong ha u snem 2005” la ong u Bah Thomas.
“Mynta, bun ki briew kiba dei ki nongshong shnong trai jylla, khamtam ki riewlum trai muluk, kan long kaba bakla lada ki shah weng ne shah kyntait naka thup kyrteng thep vote hadien bala pyndep iaka SIR” u la bynrap.
U Bah Thomas u la pynpaw ka jingsngewkhia halor ki khubor ba la aiti ban sam ia ki phorm lum jingkhein briew (Enumeration Forms) ha ki nongmihkhmat naki sengsain pyrthei.
“Ngi la iohi ia ki khubor ba ia ka phorm lum jingkhein briew (Enumeration Forms) la ai sha u nongmihkhmat naki sengsain pyrthei, kaba mut ba u nongmihkhmat ne ka seng sain pyrthei ki lah ban pyndonkam ia ka na ka bynta ka jingmyntoi sain pyrthei jong ki” ula ong.
Haba ia dei bad ka 18-West Shillong constituency, u la ong ba ka constituency ka pyni ia ka jingkylla ha ka jingbun briew.
“Ka 18-West Shillong constituency ka dei ka thain ha kaba ki riewlum trai muluk ki dei ki nongthep vote rit paid, bad kumno ki la kylla rit paid, Ka long kaba phylla haduh katta katta” ula ong.
“Lada phai biang sha ki snem ba mynshwa, ki riewlum ki dei ki nongshong shnong kiba bun paid ha katei ka jaka, hynrei suki suki, ki riewlum ki la kylla long ki rit paid ha ka thup kyrteng thep vote” u la ong.
“Kumta ngi sheptieng ba lehse ki riewlum trai muluk kin shah weng ne shah kyntait ha ka SIR, bad lada jia kumta, kan long ka jingshah pynjot ia ka rukom synshar ne ka sain pyrthei ha ka Jylla Meghalaya” u la bynrap.
U Nongïalam ka KHNAM u la dawa ruh ban leh eiei ïa ki nongthep vote kiba don bun tylli ki Voter ID. “Ha kaba ïadei bad ki nongthep Vote ki bym dei ki riewlum trai muluk, la pynshisha bad la tip, ba bun na kine ki nongthep vote ki bym dei na kane ka Jylla ki don sa kiwei pat ki EPIC nala ki jong ki Jylla ba ki wan” ong u Bah Thomas.
“Ki leit thep vote hala ki jylla ba ki dei trai shnong bad ynda la wan ka elekshon ha Meghalaya, ki thep vote ruh hangne, kaba mut ba ki don 2 tylli ki EPIC, bad ka jingdon 2 tylli ki EPIC ka long be-aiñ katkum ka Election Commission of India,” u la ong.
“Ngi kyrpad ia ka tnad ilekshon, haba pyntrei ia ka SIR, ba kin pynthikna ba baroh kine ki briew kiba la don lypa ia ki EPIC nala ki Jylla ba ki wan, yn pyndam noh ia ka kyrteng jong ki na ka SIR”, u la ong.
U Bah Thomas u la kyrpad ia ki nongshong shnong ban pynshisha ia ka jingpynrung kyrteng jong ki ha ki thup kyrteng thep vote.
 jong ka Electoral Roll, ka Khun Hynniewtrep National Awakening Movement (KHNAM) ka la iathuh ba kan sa thoh sha u Chief Electoral Officer (CEO) ban dawa pyrrkhing bha ia ki jingpynshisha ban pynthikna ba ki riewlum trai muluk kin nym shah kyntait ha ka Electoral Roll.){kind=link}