Shillong, Naitung 3 : U Myntri Rangbah Conrad K Sangma ha ka sngi Thohdieng ula maham ba ka jingkylla ka suinbneng kam dei shuh ka jingeh jong ki snem ban wan hynrei kaba la jia mynta, haba khot ia ka jingdonkam ban leh eiei noh kyrkieh ban pynkhlain ia ka jingpynkhreh ka Jylla ia ki lad ki lynti ban ialeh pyrshah ia ka jinglong bym thikna ka suinbneng.
U Conrad ula pynpaw ia kane ha ka workshop halor ka phang ‘Developing State Response for El Niño Preparedness: Strengthening Food and Water Security,” haba pynpaw ia ka jingdonkam kyrkieh ia ka jingiatreikam lang, ki kam kiba donkam ban leh namar ka jinglong bym thikna jong ka suinbneng nangne shakhmat.
Haba pynpaw ia ka jingkhia ka kam na ka jinglong jingman ba mynta, u Myntri Rangbah ula iathuh ba ka Meghalaya kala sakhi ia ka jingduna ka jingioh slap kaba long palat 80% ha u bnai Jylliew.
Ula maham ba katba ki jingbatai antad (forecast) ki lah ban ai ka jingkyrmen, ki jingpynkhreh ki dei ban iai long ki kam kiba hakhmat eh.
“Ka jingkylla ka suinbneng kam dei shuh ka jingeh jong ki por ban wan : Ka dei kaba la mad mynta. Watla ki jingbatai lypa ki lah ban kylla, ki jingpynkhreh kim lah ban ap” ong u Myntri Rangbah.
Da kaba shimia ka jinglong jingman kum ka “jingeh kaba la don mynta,” u la banjur ba ki jingshimkhia bad ki jingpyrshang da ka jingiatreikam lang hapdeng ki Tnad bapher bapher, ki Shnong bad ki jaka treikam ki long kiba kongsan ban pynduna ia ki jingktah kiba lah ban mih.
Ula kyntu ia ki Ophisar ba kin wanrah ia ki lynti treikam kiba lah ban pynkylla bad ba lah ban pyntreikam, kiba ialam da ki jingkhein jingdiah bad kiei kiba jia ha Jylla.
“Ngim lah ban ap ia ka plan kaba biang nadong hadong, Ngi dei ban leh eiei noh mynta. Man ki sienjam ba ngi shim mynta kan pynwandur ia ka jinglah ban ialeh pyrshah jong ki pateng ban wan” ula bynrap.
Ula kren ruh halor ka jingkyntiew ia ka kam rep khlem khleh dawai, haba pynpaw ba ka jingpyrshang ka Jylla ka la ioh ia ka jingithuh hapoh ka Ri, kynthup ka jingioh jingiaroh naduh u Myntri Rangbah Duh ka Ri.
Ula ban jur ruh ia ka jingdonkam ban wanrah lang hajuh ia ki buit treikam bapher bapher, kynthup ia ka jingtynkai um, pynim ia ki shyngyiar bad ban shna ia ki jingtei ki ban pynlang ia ka um kum ki check dam bad reservoir
“Ia ka jingjop ym dei ban thew tang da ki skhim marwei, hynrei da ka jingiapher ba shisha ba ngi wanrah ha ka jingim ki briew” ula kynthoh.
Haba ban jur ia ka jingiashimbynta lang ki shnong ki thaw, u Myntri Rangbah ula khot ia ka jingiadon bynta lang kaba khraw jong ki nongmihkhmat paidbah, ki Dorbar Shnong, ki Self Help Group bad ki samla pule ban pynkhlain ia ka jing pynsngewthuh paidbah bad ban long trai ia ki jingpyrshang baroh ha ka jingialeh pyrshah ia ki jingkylla ka suinbneng.
Kane ka workshop kala wanrah lang shi jaka ia ki Heh Ophisar, ki Deputy Commissioner, ki stad ka rep ka riang bad ki kynhun ba don bynta ban iakren a ki buit treikam ha kaban pynkhlain ia ki jingpynkhreh ka Jylla pyrshah ia ka El Niño bad ban pynthikna ia ka jingshngain ha ka jingdon ka bam bad ka um.
