Shillong, Nailur 02 : Ka Sorkar Jylla kala bthah ia u Advocate General Amit Kumar ba un kiar shuwa na ka jingleit iakhun mukotduma ha ki Iingkashari haduh artaiew katba ka dang iakren bad ki nongsaid ain ba dawa weng ia ki, ong u Myntri ka tnad Ain Bah Lahkmen Rymbui ha ka sngi Balang.
Ka Meghalaya High Court Bar Association bad ka Shillong Bar Association kila pynlong ia ka jingiakhih da kaba boycott ban leit mih sha Iingkashari halor ka jingdawa ban weng noh ia u Amit Kumar kum u AG namar ka rukom treikam jong u.
U Bah Rymbui u iathuh ba baroh artylli ki association ha ka sngi Ba-ar, kila pynsngew ia bun ki jingeh jong ki, kynthup ka jingpyrshah ia u AG bad ula kular ban sa leh eiei na ka tnad Ain.
Ia kane ka kam la iakren biang ha ka sngi Balang ha ka jingialang bala pyniaid da u Symbud Myntri Rangbah ba khmih ia ki kam pohiing (Police) Bah Prestone Tynsong, kaba la iashimbynta da baroh artylli ki association hapdeng ka jingpyntip ba lyngkot.
“Ki juh ki jingdawa jong ki…ki pyrshah ia ka rukom treikam jong u Advocate General, ha kaba kila kwah ban weng noh ia u” ong u Bah Rymbui.
Ula ong ba ka jingthung ia u AG kaba dei ka kam ba leh kat kum ka riti synshar, ka dei kaba hap ban rai da ka Kynhun Myntri, hynrei kum ka sienjam ba shipor, ka Sorkar kala kyrpad ia u AG ban nym leit mih sha Iingkashari.
“Ngi la kyrpad ia u AG ba kine ki artaiew ban wan ba nym nym leit sha Iingkashari ban iakhun mukotduma…hapoh ka shitaiew ngin sa iakynduh biang haba iadei bad baroh ki mat jingdawa jong ki” ula ong.
Ula kyntu ia kiBar Association ba kin iatreilang bad weng noh ia ki jingiakhih katbym pat long ka jingia kren, haba pynpaw ba ka Sorkar ka donkam ia ka por ban bishar ia kiei kiei baroh.
“Ki Bar Association kila pynpaw ba kin shim ia kaei kaba kyrpad da kaSorkar ia ki dkhot” ula ong haba bynrap ba u kyrmen skhem ba kin weng noh ia ka jingiakhih.
U Bah Lahkmen ula ong ba kane ka kam ka dei kaba lah ban pynbeit tang lyngba ka jingiakren, ym ka jingiapyni bor haba bynrap ba ia kiwei pat ki jingdawa ba iadei bad ka jingtreikam jong ki, ka Sorkar kan sa khmih biang bad sa shim ia ki lynti ban pynbeit.
