Shillong, Nailur 03 : U President ka Khasi Students’ Union (KSU) samla Raymond Kharjana ha ka sngi Balang ula ong ba ka jingpynngat bun tylli ki case pyrshah ia ki nongialam kan ym pynkynran dien ia ka seng bad dawa ba ia ki mat jingdawa bala dawa da ka Central Executive Committee dei ban pyntreikam da ka Sorkar khlem ka jingpynslem.
Ia u samla Raymond la ialam tian bishar biang ha ka sngi Balang hakhmat ka Iingkashari ha ryngkat bad ki lai ngut kiwei pat-Vice President samla Pynkmenlang Sanmiet, General Secretary samla Reuben Sanmiet bad Assistant Organising Secretary samla Jeremaiah Pohthmi- haba iadei bad ki jingjia kam thombor ba jia ha ka rally thuk thuk ka KSU myn ha ka 19 tarik Nailar.
Haba kren sha ki nongthoh khubor, u samla Raymond ula ong ba ka Sorkar kala pyrshang ban pynlong sohpdung ia ki nongialam.
“Ngi la ong naduh kaba sdang ba ki pyrshang ban pynlong sohpdung ia ki nongialam, hynrei kaei kaba nga kwah pynshai ka long ba wat lada ki pynngat haduh 10-20 tylli ki case ha ngi, ngim khuslai shuh” ula ong.
“Hynrei kaei kaba kongsan ka long ba ia ki mat jingdawa kaba ka CEC kala dep iakren bad pynsngew hakhmat ka Sorkar, dei ban pynurlong, ym dei shuh ban nang pynslem” ula bynrap.
U ong ba ka KSU kala shim ia ka rai da ka jingkut jingmut kaba skhem bad ia ka nongrim jong ka da lei lei ruh ym lah satia ban pynkhein.
Hadien, u General Secretary barim ka KSU samla Donald Thabah ula niew ia kane ka jingpynngat case kum ka jingleh donbor.
“Kane ka dei ka jingleh donbor. Ngim tip sa katno tylli ki case kin dang ban pynngat hynrei ngi kwah ban kynnoh ia ka Sorkar ba ka kwah ia ngi ban shong sah ha phatok” ong u samla Donald.
Ula maham ba kane ka jingbteng ban leh donbor ia ki nongialam kan pynbitar ia u paidbah.
Halor ka jinglong ki case, u samla Donald ula ong ba ka jingshai kan dang ban mih.
Haba kylli halor ka jamin, ula ong “Ki don katto katne ki case ia kiba la aplai ia ka bah jamin, kumta ngim pat lah ban kren halor kane”.
Halor ka sienjam ban pynbud, ula ong “Ngi hap ban iapeit ia kaei kaba ka CEC kan shim mynta ia ka sienjam”.
