Shillong, Nailur 02 : Artylli ki jingiakhun ba itynnad ka Shillong Premier League 2026 lah sakhi hynne ka sngi Balang ha kaba ka Mawlai kala pynliem da 1-0 kol pyrshah ia ka Nongkseh katba ka champion Langsning kala pynliem kput ia ka Laitkor da 6-1 kol.
Ka shi kol jong ka Mawlai SC ka la wan lyngba ka freekick ha ka extra time, ha kaba u Damanbhalang Chyne (90’+5), u la lah ban pynkhun ia ka bol na kyndong ban pynkhih ia ka jar.
Ka Nongkseh SSCC ka wan rung sha kane ka jingiakhun hadien ba ka dang shu dep ban mad ia ka nam rem kaba long da 1-0 hakhmat ka Shillong Lajong FC.
Baroh artylli ki kynhun kila ialehkai bha ha kane ka jingiakhun bad kila ia ioh markylliang ia ki kabu ban pynkhih jar hynrei ka jingialehkai phikor bad peitngor bha jong ki rang ialehkai na baroh arliang, baroh kine ki kabu kim shym la lah ban pynkylla sha ka kol.
Hynrei ha ki minit ba ka jingiakhun ka la khreh ban jam artad sha kaba kut, ka Mawlai ka la ioh ia ka kabu ksiar ba paka bad ba khatduh da ka jingioh lad ban shut ia ka freekick na shabar ka box ka Nongkseh lyngba u Damanbhalang uba la lah ban pynkhih ia ka jar.
Haba phai pat sha ka kynhun ialehkai jong ka Langsning FC, ka jingjop ka jong ka ia ka Laitkor SC lah ban ong ba ka la dei lypa naduh ba kut tang ka kylla step, hadien ba ka la lah ba kan tam lypa shakhmat haduh saw kol.
U namtam ha kane ka jingiakhun dei u Mebanshngain Kurkalang (10’, 12’), uba la lam khmat ia ka kynhun ban thep artylli ki kol, bad ia ki kol kiba sah pat la thep ia ki da u Damonlang Pathaw (45’), Syed Ahmed (45’+4), Samuel L Kynshi (84’) bad Rohan Manar (90’+4).
Kumban shu pynkynmaw ba kane ka jingiakhun hapdeng kine ki ar kynhun kadei hadien bym shim la lah ban pynlong ha ka 28 tarik u bnai ba la dep hadien ka jingwan ther noh kynsan u slap u ba jur.
Ia ka shi kol ban lait brut ka Laitkor na kane ka jingiakhun la thep ia ka da u Hamingbert Nongbet (54’).
Haba phai sha ka miej ia khein point, ka Mawlai SC ka la ioh ba kan khur pura 10 point mar ia ryngkat bd ka Shillong Lajong FC, kaba jingiapher hapdeng kine ki ar kynhun ka long ha ka jingiathep kol (goal difference +7 la +4).
Katba ka Langsning FC ka don mynta ha ka kyrdan kaba lai hadien ba ka la khur 9 point, ka Nongkseh kan hiar sha ka kyrdan ba 6 hadien ba ka la khur tang 4 point, ka Laitkor ka don ha ka kyrdan ba 8 hadien ba ka la lah ba kan khur tang 3 point.
Lashai ka sngi, ka Sawmer kan mih madan ban iakhun pyrshah ia ka Nangkiew Irat kaban long ha ka por 3:40 PM, kaba hangne ka Sawmer kan hap ban trei shitom ban lah ban khur ia ka jingjop hadien ka jingshah rem kaba long da 4-2 hakhmat ka MLP FT, katba na ka liang ka Nangkiew Irat, ka mynsiem iakhun ka jong ka kan iai rhem katno tam lei lei hadien ki artylli ki nam jop kiba ka la ialehkai dang shen.
