Kular u Myntri ban leh eiei hapoh ka artaiew
Shillong, Naitung 02 : U MLA ka NPP na Mawkynrew Bah Banteidor Lyngdoh ha ka sngi Palei ula kyrpad ia ka Sorkar Jylla ban khang shuwa shipor ia ka jingpynpoi sniang na shabar ka Jylla, haba kdew ia ka jingpur ka khlam bad ka jinghiar dor ki sniang trai jylla kaba la ktah jur ia ki nongri jingri.
Haba kren hadien ka jingialang bad u Myntri ka Tnad Animal Husbandry & Veterinary Bah Sanbor Shullai, u Bah Banteidor ula iathuh ba u Myntri ula ai ka jingkular ha u ba un sa iakren ia kane ka kam bad u Myntri Rangbah hapoh ka artaiew.
“Nga ai khublei ia u Myntri Bah Sanbor Shullai namar kane ka jingialang ka long kaba seisoh” ong u Bah Banteidor. “Ngi la iakren ia shibun ki kam ba iadei bad ki jingeh ba iakynduh da ki nongrep jong ngi khamtam kito kiba ri jingri”.
U iathuh ba ka jingiakren, ba la pynlong ha ka jingiadonlang ki Ophisar ka Tnad, ka long kaba bniah bha bad kaba sngewhun haba khmih ia ka jingkhia jong ka jinglong jingman.
“Kane ka dei ka kam kaba sngewkhia jur bha namar ka ktah ia ka jingiap ki sniang bad ktah ia ki nong ri jingro, kaba la ktah jur ruh ia ka dor jong ki sniang ha kylleng ki jaka ka Jylla” ula ong.
Kat kum ka jingong jong u, ki nongri sniang kiba ju die ia u sniang baroh shikatta ha ka dor T.17,000 haduh T.18000 mynta ki hap ban die tang T.11000 lane T.10,000 namar ka jingpur ka khlam kaba don jingiadei bad ki sniang ba wanrah na shabar ka Jylla.
U Bah Banteidor u iathuh ba u Myntri ula kular ba un sa iakren ia kane ka kam bad ka Sorkar halor ka jingdonkam ban khang shuwa shipor ia ka jingwan pynpoi sniang na shabar bad ban pynmih ia ka jing pynbna ban khang ia ka jingnang pur jong ka khlam bad jingiap ki sniang.
