Shillong, Naitung 3 : U Myntri Rangbah ka Jylla Conrad K Sangma, ha ka sngi Palei, ula plie ia ka Centre for Capacity Building and Empowerment jong ka Presbyterian Church of India, Phase-I bad Phase-II jong ka project ha ka jingiadonlang u Symbud Myntri Rangbah Bah Prestone Tynsong.
Haba ai jingkren ha ka jingialang, u Myntri Rangbah ula pynshai ia ka jingthmu kaba kham jylliew ha lyndet kane ka kam, haba pynpaw ba kam dei satia tang u mawmer ha ka jingtei hynrei ka rynsan ban pynkylla ia ka jingim bad pynkupbor ia ki samla.
Haba kren ia ki nongrim ba btin lynti ia u kaba long “La kha ban shakri” ula pynpaw ba ka synshar khadar bad ki jaka trei kam ba kynja mynsiem ki don ia kajuh ka mishon, ban shakri ia ki briew da ka jingaiti lut, ka jingsngewrit bad ka jingkut jingmut.
Halor ki jingsngewkhia kiba tawiar sawdong ka FCRA Amendment Bill, ula kren halor ki jingeh kumba pynpaw da ki Balang bad ki seng Niam kaba lah ban ktah ia ki kam shakri para briew.
“Katba ka lynti iaid jong ngi ka lah ban iapher, ka thong ka dei kajuh, ban shakri ia ki briew jong ngi” ula ong, haba iai ban ia ka jingkongsan ka jingialong kawei ha kaban pynbeit ia kine ki jingeh kiba kyllain kum ka FCRA Amendment. Ula khot ia ki nongshongshnong bad ki nongialam niam ba kin duwai bad iatrei ryngkat ryngkat ha kaban pynthikna ba ki jaka treikam kiba shakri ia ka imlang sahlang kin nang bteng ban treikam kham bha khlem ki jingshah pynthut.
Haba kren halor ki jingnoh synniang jong ki Balang, u Myntri Rangbah ula iaroh ia ka bynta ka bym pat ju don ba leh mano mano ruh, kaba la leh da ka Presbyterian Church ha ka pule dangle, ka koit ka khiah bad ka roi ka par ki imlang salang, wat hashuwa ka jingmih jong ki rukom synshar da ki Sorkar ba pura.
Haba pynskhem biang ia ka jingkut jingmut ka Sorkar, ula kular ia ka jingkyrshan na ka bynta ka Phase-III ban wan jong ka project bad ban jur ia ka thong ban pynroi ia ka centre kum ka hub of excellence kaba saindur ia ki nongshongshnong kiba don ka jingkitkhlieh, kiba lah ban leh ia kano kano ka kam bad kiba sngewtynnad ban shakri.
“Ka long ka burom ban sngewthait ban leh ia kaei kaba ngi la duwai shisien ka por,” u la kynthoh, da kaba pynshlur ia baroh ban iohi ia ka jingshakri ym kum ka jingkit, hynrei kum ka jingkyrkhu.
