Pan jingbit ka HPC na ki Pulit ban thaw Volunteer Wing ban iakhun droks ha Them Metor

Shillong, Naitung 3: Da kaba pynpaw ia ka jingsngewkhia jur halor ka jingroi jong ka jingkhaii droks bad ka jingkyrni jong ki samla, ka Harijan Panchayat Committee (HPC) kala pan ia ka jingkyrshan kaba kyrkieh na ki pulit ban buh ia ka Youth Volunteer Wing hapoh jongka Section 43 jongka NDPS Act, 1985 ban tehlakam ia ka jingkhaii droks hapoh Harijan Colony, Bara Bazar.

Ha ka shithi kaba la phah sha u Officer-in-Charge, ka ANTF East Khasi Hills District, ka HPC kala ong, ba ki nongkhaii droks kila die pyllein pyllein ia u droks ha ka shnong wat hapdeng ba kila dep ban ai jingujor ha kaba kala ktah jur ia ka imlang sahlang bad ia ka koit ka khiah bad bun ki samla kila sdang ban ngop ha u droks.

“La suba jur ba kine ki nongdie kidei kiba don da ka jingthmu ban pynngop ia ki samla jong ka shnong da ka jingthmu kaba sha lyndet ban pynhiar dor ia ka imlang sahlang ka jong ngi bad ban pynthikna ba ngin ym lah ban ieng kum kiba don burom bad ki nongshong shnong kiba lah ban shaniah hapoh ka jylla” la pynpaw ka HPC.

Kane ka jingkyntu kadei hadien ba la dep pynlong ia ka jingialang jong ka General Body Meeting kaba la long ha ka 28 tarik u Jylliew, 2026, ha kaba ki nongshong shnong da kawei ka jingmut kila shim ia ka rai ban shim da ki sienjam bad ka jingpyrkhing kiba tyngeh da ka jingiarap ki pulit ban iakhun pyrshah ia ki nongkhaii droks.

Ka jingialang kala rai ban thaw ia ka “Youth Volunteer Task Team” kaban kynthup ia ki nongshong shnong kiba pura kiba ha ka rta 18-35 snem ban iarap ia ki pulit ha kaban peitngor bad ban ai ia ki jingtip.

Ka HPC kala kyrpad ia ki pulit ban buh ia u ophisar ban ai jinghikai ia ki Volunteers halor ka jingiaid katkum ka aiñ, ki rukom syntiat, ka jingleh kaba shngain bad ban ai iaki jingtip bad ban ai jingmynjur ia ka rukom treikam da kaba ai jingsoi ia ki Volunteer Identity Cards da u In-Charge jongka Police Beat House ban don ia ka jingiatreilang kaba ryntih.

“Da kaba sngewrit ngi kyrpad ba ka Section 43 jongka Narcotic Drugs and Psychotropic Substances Act, 1985 ka pynkup bor ia uno uno u briew ban kem ia kiba leh kam sniew bad ban aiti ia u droks ne jingdih be-aiñ sha u ophisar uba la shah pynkup bor hapoh jong katei ka aiñ” la ong ka HPC.

“Halor jong katei ka kyndon, ki samla kiba la ioh jinghikai pyntbit hapoh ka jingialam bad jingpyniaid jong ki pulit, kin lah ban long kum ki nongshong shnong kiba don ia ka jingkitkhlieh ban iarap ia ka Tnad Pulit ha kaban kem ia ki nongkhaii bad ban aiti sha ka aiñ”.

Ka committee kala pynthikna ba kan ai ka jingiatreilang kaba pura bad ban bud ryntih ia baroh ki kyndon aiñ bad ka ong, ba kane ka sienjam kadei da ka jingthmu “Ban iada ia ki samla jong ngi, ban pynneh ia ka shongsuk shongsain bad ban pynlong ia ka Harijan Colony kum ka shnong kaba lait na u droks na ka bynta ka bha ka miat jong ka imlang sahlang”.

Katkum ka Resolution kaba la mynjur ha ka 28 tarik u Jylliew, la rai ba ka Youth Volunteer Task Team kan treikam hapoh ka jingbtin beit beit jong u SP ka East Khasi Hills bad u In-Charge jongka Police Beat House, 29 Cantonment, Shillong.

Ki Volunteers kin leit ban ioh ia ki jinghikai pyntbit na ki pulit hashwa ba kin shim ia ka bynta ban trei ia ka kam ka jongki katkum ki kyndon kiba la buh.

Ka kamram jong katei ka kynhun ka long ban iaid pahara ha ki kynhun kaba don 4-5 ngut naduh ka por 7 baje mynstep haduh 10 baje mynmiet na Shaheed Bhagat Singh Road, ki lynti iaid paitbah, ki jaka iew bad ha Syndicate Bus Stand ha ryngkat bad ka jingpyntip mardor ia kano kano ka jingleh kaba suba sniew sha ka 29 Cantonment Police Beat House bad sha ka Anti Narcotics Task Force. Kane ka kynhun kan pynlong ruh man la ka taiew ia ka jingleit pynsngewthuh ha man la ki iing halor ka jingma jong u droks.

Ka HPC kala pynpaw ruh ba ka painkhana paitbah kaba don ha ka shnong kala kylla long kum ka ktem jong ka jaka dih droks namar ka jingrit palat ka kynroh ia kaba ioh ban iaid lyngba na Lum Survey bad kala kyrpad ia ki pulit ba kan kynthup ia katei ka jaka ha ka jingleit iaid pahara ka jongki.

Ban pynkhlain ia ka jingpeitngor, ka General Body kala shim ruh ia ka rai ban kyrpad ia u MLA ka thain u Bah Adelbert Nongrum, Deputy Commissioner bad ia ka Shillong Municipal Board ban pyndait ia ki kor CCTV Camera ha ki 6 tylli ki jaka kiba kongsan bha, hapoh jongka Safe City Project ne Smart City Mission, ha kaba ka HPC ruh kan ioh ia ka lad ban khmih ne peitngor lang. Ka Committee kala ong, ba kan pynlut ha kaban sumar bad ban khmih ia kine ki kor ki bor bad kan ym don ruh kano kano ka jingpyndonkam bakla ia ki video.

Halor ka jingujor ba ki don ki briew ki bym sah hapoh ka shnong kiba donkti ha kaban khaii droks, ka HPC kala rai ban ai da ka jingujor ha u SP ka East Khasi Hills bad ha u Officer-in-Charge, Bara Bazar PS, ban phah ban pynshisha bad ban leh ia kaba donkam katkum ka aiñ.

“Ka HPC ka iengskhem ha kaban ai ka jingiatreilang kaba pura ia ki pulit jongka East Khasi Hills Police ban pynlong ia ka shnong kaba lait na u droks, kaban iaid beit ryntih katkum ki kyndon jong ka aiñ” la ong ha ka Resolution.

Ka Committee kala kyntu ruh ban shimkhia mardor ia kane ka mat kum kaba donkam kyrkieh bha bad ban lum kloi ia ka jingialang ban iakren ha kaban ai jinghikai pyntbit bad ban shim ia ki lad ban ia shimkhia lang ban iada ia ka lawei jong ki samla.