Pynlait ia ka prokram ‘She Thrives’ namar ka khuid ka suba ki Khynnah haba poi jingpoi
Shillong, Naitung 02 : U Myntri Rangbah ka Jylla Conrad K Sangma mynta ka sngi ula plie ia ka Boarding Building ba dang shu tei thymmai jong ka skul Pine Mount ha ka jingiadonlang u Bah Lahkmen Rymbui, kaba pyni ia ka jingpynurlong ia ka jingkular bala ai sha ki khynnah skul hadien ki jingpynsngew ia ki jingeh namar ka jingbym biang ki hostel ha u snem 2022.
It gives me great satisfaction to be back at Pine Mount School today to inaugurate the new Boarding Building, dedicated to the boarders and students of this esteemed institution.
In 2022, after receiving complaints from students about the dilapidated hostel and poor living… pic.twitter.com/aAGwpruuIC
— Conrad K Sangma (@SangmaConrad) July 2, 2026
Haba pynkynmaw ia ka jingleit jong u sha kane ka skul ha u Risaw 2022, u Myntri Rangbah ula ong ba u sngewshon bha ban tip ia ki jingeh bala mad da ki khynnah ba sah boarding, kiba la pynsngew ia ki jingeh kum ka jingpei ka tnum, jingsniew ka madan bad ka jinglong jingman ka bym shngain ban sah.
“Ha ka por ba nga wan sha ka skul ha u 2022, Nga la iakren bad ki khynnah pule bad la iohi markhmat ia ki jingeh kaba ki hap ban mad. Ka jinglong jingman ka hostel kam dei tang ba kam long kaba biang, hynrei ka ktah ruh ia ka bha ka miat bad ka pule puthi jong ki khynnah” ula ong.
Haba shimkhia ia ki jingeh jong ki, u Myntri Rangbah ula bthah ban leh eiei mardor bad kular ia ki khynnah pule ba ia ka boarding hostel yn sa tei thymmai. Haba wan biang sha campus hynne ka sngi, ula pynpaw ia ka jingsngewhun ban iohi ba ki jingkular kila urlong shisha.
Haba ban jur ia ki thong kiba bun jong ka Sorkar, u Myntri Rangbah ula iai ban ba ka pule puthi ka dang long ka kam ba hakhmat eh bad ka jingpynbha ia ki jingtei ka dei ka sienjam ba kongsan ha kaban pynthikna ia ka jingmih ba kham bha na ki jingpule. Ula pynpaw ruh ba ki jingkylla kiba don jingmut kim wan jia tang ha ka shimiet hynrei ka donkam ia ka jingpyrshang kaba iai bteng, ka jingkut jingmut bad ka jingshimkhia ia ki jingdonkam jong u paidbah.
“Ki jingkylla ki shimpor, hynrei kaei kaba kongsan ka long ba ngi leh ia ki kam haba ngi iohi ia ki jingdonkam. Kawei ka sienjam kaba rit ruh ka long kaba kongsan. Lada ngi sngap, jubab, bad trei khlem sngeh, ngi lah ban wanrah ia ka jingkylla kaba shisha” ula ong.
Ula pynlait ruh ia ka prokram “She Thrives”, ka sanitary pad vending machine kaba don bad ki sanitary pad, kaba thmu ban kyntiew ia ka khuid ka suba bad ka burom ki khynnah skul kynthei ha ba ki poi jingpoi. Kane ka prokram ka long shibynta na ki jingpyrshang ban weng ia ki jingeh kiba mad na ka sngi sha ka sngi da ki khynnah kynthei ha ki skul. U pyntip ba ia kane ka prokram yn sa pyntreikam ha baroh kawei ka Jylla ban pynthikna ba man ki khynnah kynthei kin ioh ia ki jingdonkam ha ka jingleh khuid.
Ha ka jingialang iakren markhmat bad ki khynnah skul, u Myntri Rangbah ula ai jubab ia ki jingkylli haba iadei bad ki kabu iohkam iohjam bad ka lawei jong ki khynnah mynta. Ula batai ba katba ka jingdon ki kam Sorkar ka long kaba duna bha, ka Sorkar kala thaw ia ki policy bad ki prokram ban thaw ia ki lad ki lynti lyngba ka jingsengkam sengjam bad ka jingkiew ha ka kam shimet.
“Ngi dei ban sngewthuh ia ka jingshisha, manla u snem da ki hajar ngut ki samla ki rung ha ka jylli wadkam, hynrei tang khyndiat tylli ki kam Sorkar ki don. Kumta, ka lawei ka shong ha ka sengkam lajong, ka buit treikam thymmai bad ki kompani shimet” ula ong.
Ula batai shuh shuh ba ka Sorkar kala kynshew ha ki kam kiba kongsan kum ka kam jngohkai, IT, ka rep ka riang, bad food processing ban lah aikam aijam bad kyrshan ia ki samla kiba angnud ban sengkam lajong.
