Shillong, Naitung 02: Ka Hynñiewtrep Integrated Territorial Organisation (HITO) ka la ujor sha ka Meghalaya State Pollution Control Board (MSPCB), pyrshah ia ka RNB Cement Pvt Ltd ha Umiam, Ri Bhoi District da kaba kynnoh ba kane ka karkhana ka pynjaboh iaka lyer bad ka jingpynkheiñ aiñ ïada mariang.
Ha ka ujor sha u Member Secretary ka MSPCB, u President ka HITO bah Donbok Dkhar u la ong ba katei ka karkhana ka pynmih shibun ka jaboh bad ka tdem iong sha ki sawdong sawkun.”
“Ngi sngewkhia khamtam eh, ba ha ki katto katne ki khep, ki jingmih tdem ka long na kiwei pat ki jaka ba lait thliew ban na ki atoskhana ba la buh kyrpang, kaba pynlong ïa ka jingpynmih tdem iong kaba jaboh bad ba rben sha ka suiñbneng khlem da tehlakam,” ong ka shithi.
Katkum ka jingong ka HITO, ki nongshong shnong kiba don hajan, ki la pynpaw ïa ka “jingsngewkhia kaba jur halor ka jingmih ka tdem iong bad ka jingktah nangne shakhmat.
“Kum kine ki jingmih tdem la iathuh ba ki la pynmih ia ka jingsngewkhia kaba jur hapdeng ki nongshong shnong kiba don hajan, kiba tieng ia ka jingshah ktah haka koit ka khiah, ki jaka rep, bad ia ka mariang” ong ka jingujor.
“Ka jingiaipynmih jaboh dewbilat clinker bad ka tdem iong ka lah ban ktah ïa ka jinglong ka lyer bad ka lah ban wanrah jingma ïa ki paidbah khamtam ia ki khynnah, ki tymmen, bad ki briew kiba don jingpang pynhiar mynsiem” ka la bynrap.
Ka seng ka la bthah ia ka MSPCB ban pynlong ia ka jingjurip mardor bad ban khmih bniah ia ka karkhana bad ban pynshisha ia ka jingbud ryntih ia ka ain Air (Prevention and Control of Pollution) Act, 1981, ka Environment (Protection) Act, 1986 bad kiwei kiwei ki kyndon ain.
Ka HITO ka la kyrpad ia ka Board ban bishar bniah hato ki jingmih tdem ki mih lyngba ki jaka bala buh kyrpang (atoskhana) ne katkum ka ba la mynjur iaka rukom pynmih tdem.
Kala kyntu ruh ïa ka MSPCB ban bthah ïa ki bor badei khmih ban pynsaja iaka karkhana lada lap ïa ki jingpynkheiñ kyndon bad ban “buddien ïa ka jinglong ka suiñbneng ha ki shnong ba marjan bad pynmih paidbah iaka kaiphod”.
Ka la aiti ruh ia ki video jong ki jingpynmih tdem ha ryngkat bad ka jingujor haba pynpaw ia ka jingkhmih lynti ban ioh jingtip ia ka sienjam ba la shim daka MSPCB.
 ka la ujor sha ka Meghalaya State Pollution Control Board (MSPCB), pyrshah ia ka RNB Cement Pvt Ltd ha Umiam, Ri Bhoi District da kaba kynnoh ba kane ka karkhana ka pynjaboh iaka lyer bad ka jingpynkheiñ aiñ ïada mariang.){kind=link}