Shillong, Naitung 1: Ka khajna jong ka jylla Meghalaya kala hiar kynsan hadien ba ngi lah map noh ia ka khajna kaba T.800 Klur kaba la pynsahteng da ki trai jong ki kali kamai hapoh jong ka One-Time Settlement (OTS) scheme, ong u Symbud Myntri Rangbah ka jylla u Bah Prestone Tynsong hynne ka sngi Balang.
Ula ong ba la shim ia katei ka rai wat hapdeng ba kan don ka jingktah ia ka pisa pilain ban kyrshan ha kaba iadei bad ka liang ka kit ia ki nongleit nongwan, kaba shimkhia haduh 95% ia ka leit ka wan ha ka jylla.
“Ha ka kynhun myntri, hadien ba u Bah Sniawbhalang bad ki ophisar ka tnad Transport kila pyni bad ai jingbatai, ngan ong ia phi ka khajna jong ka sorkar ka lah dei ban hiar kynsan” ong u Bah Tynsong.
“Ka pisa T.1,100 Klur kaba phi dei ban siew, kam dei satia ka rai kaba suk. Kam dei ruh kaei kaei kaba ngi lah ban shu map suk” ula bynrap.
“Hynrei hadien ba ngi lah iatai bha, hapoh ka jingialam u Myntri Rangbah, ngi la lah ban map noh palat T.800 Klur na ka T.1,100 Klur bad ngi khot ia kane ka scheme kaba kyrpang ka One-Time Settlement scheme”.
U Bah Tynsong ula kren ha ka jingialang pynkup burom kaba la pynlong da ka Joint Action Committee, kaba la ai burom ia u Myntri Rangbah ka jylla u Conrad K. Sangma bad ia ki Symbud Myntri Rangbah u Bah Prestone Tynsong bad u Bah Sniawbhalang Dhar halor ka OTS scheme.
Ula ong, ka long kaba kham niar, ba ka sorkar kan ioh ia kano kano ka jingithuh halor ka jingshim ia kum katei ka rai.
“Kawei kaba nga kwah ban ong, ka long kaba kham niar ban ioh ia kum kine ki prokram ha ka kam ai jingshakri ia u paitbah. Namar ba kito kiba don ha ka kam ai jingshakri ia ki paitbah, kito na ngi kiba bat ia ki kyrdan ha ki ophis kidei kiba ju shah kynthoh, shah tim bad shah kynnoh. Tang katto katne eh kiban ai jingiaroh ia kaei kaba ngi leh” ula ong.
“Khublei shibun ia ki dkhot jong ka JAC ia kane ka jingai burom. Ngi da sngewnguh shisha bad phi lah ai mynsiem shisha ia ngi”.
U Bah Tynsong ula banjur ba ki nongialam ka sorkar kim dei kiba lah ban bakla shuh bad ula iawer ban ai lem ia ka jingiatreilang.
“Ngi baroh ngi dei ki briew, sngewbha wat nym pyrkhat ba ngi pyniaid ia ka sorkar, ne tang ba u Conrad K. Sangma udei u Chief Minister, ma nga bad u Bah Sniawbhalang Dhar tang namar ba ngi dei ki Deputy Chief Minister, ngi ngin ym leh bakla shuh, nga tharai kane ka long kaei kaei kaba bakla bha” ula ong.
“Ngi donkam ban iatreilang da ka jingiajan na ka bynta ka bha ka miat jong ka Jylla Meghalaya”.
Ula ong, ba ki nongniah ia ki kali ha ka kit ka bah bad ka leit ka wan ki long kiba kongsan bha ia ka ioh ka kot jong ka jylla bad ia ka jingpyniasoh ha ki shnong ki thaw.
“Nga kwah ban ong ia phi, ba ngi ruh ngi sngewnguh ia ka jingai shakri ka jong phi baroh. Khlem ki trai kali bad kiba kit ia ki nongleit nongwan, ngam tharai ngi ngin lah ban poi sha ki shnong ki thaw” ong u Bah Tynsong.
“Namar katei ka daw, phi long kiba kongsan bha ha ki lad ban kyntiew ia ka ioh ka kot jong ka jylla Meghalaya ka jong ngi.”
Ula kyntu ia kiba donbynta ha kane ka kam ba kidei ban pyndonkam bha ia ka jingmap ia ka jingsiew khajna kum ka lad ba kin lah ban kiew bha shaphrang.
“Kumta nga kyntu ia baroh ban shim ia kane kum ka kabu ksiar kaba la ai sha phi da ka sorkar bad nga ngeit skhem ba nangne shakhmat phin lah ban roi shuh shuh ha ka kam jong phi ha ka liang ka kit ia ki nongleit nongwan” ong u Bah Tynsong.
 scheme, ong u Symbud Myntri Rangbah ka jylla u Bah Prestone Tynsong hynne ka sngi Balang.){kind=link}