Shillong, Naitung 01 : Ka Meghalaya High Court kala pynsangeh ia ka general meeting ba kyrpang jong ka Meghalaya Cricket Association (MCA) bala buh ban long ha ka 3 tarik Naitung bad pynsangeh shipor ia ki rai bala mynjur da ka jingialang ba kyrkieh ka Apex Council ba long ha ka 9 tarik Jymmang haba kdew ia ki jingkynnoh kiba tasam bad jingpynkhein ia ka riti treikam ka MCA.
Ia ka hukum la pynmih da ka Iingkashari u Justice HS Thangkhiew ha ka sngi Balang hadien ba shong bishar ia ka jingujor bala mudui da u President ka MCA bad MP ka Rajya Sabha James K Sangma pyrshah ia u Honorary Secretary Bah Royonald Kharkamri bad 6 ngut kiwei pat.
U James ula pan ia ka jingpynsangeh ba shipor ia ka notice ba 27 tarik Jylliew, 2026, ban pynlong ia ka general meeting ba kyrpang bad ban khang ia u Bah Kharkamni ban pynlong ia ka jingialang na ka bynta ka MCA.
Ka jingujor kala pan ruh ia ka jingiada ia ka bor treikam bad jinglong laitluid jong u Ombudsman ka MCA.
U senior advocate RS Rao bad N Mozika, kiba mihkhmat ia u nongmudui ha ryngkat u advocate M Myrchiang, kila pyntip ba u bah Kharkamni ula pynlong ia ka jingialang ba kyrpang jong ka Apex Council kaba long beain, ha ka 9 tarik Jymmang, 2026 khlem ka jingmynjur jong u President bad kum ka jingialeh pyrshah ia ka hukum pynsangeh bala pynmih da u Ombudsman.
U nongmudui ula iasaid ba ka jingialang ba 9 tarik Jymmang kala pynkhein ia ka Rule 18©(iv) jong ka riti treikam ka MCA. Haba jubab, u James ula pynmih ia ka notice ba sospon ha ka 7 tarik Jymmang sha baroh ki dkhot ka Apex Council. Haba la pyniaid beit shakhmat ia ka jingialang, u James ula phah da ka jingthoh hakhmat u Ombudsman hapoh ka Rule 41 (1)(a).
“Da ka hukum ba 08.05.2026, u Ombudsman ula shimkhia ia kane ka jingujor bad bthah ba ka jing pyniaid shakhmat haba pynbud ia ka notice ba shah tynjuh bala pynmih ha ka 06.05.2026, kan iai bteng ban sangeh shuwa tad haduh da pynmih da kawei pat ka hukum” ong ka hukum.
Wat hapdeng kane, ki nongshah mudui No1 haduh 5 kila pynlong ia ka jingialang ha ka 9 tarik Jymmang da kawei ka jingthmu ban pynneh ia ka rai bala shim ha ka jingialang 26th Apex Council ba 07.03.2026, kaban kynthup ruh ia ka jingthung ia u Ombudsman” pyntip u nongmudui.
Ka jingialang 26th Apex Council ba long ha ka 7 tarik Lber, 2026 ka dei kaba la iashimbynta da u Bah Kharkamni bad kiwei bad kila ai jingmynjur ia ka jingthung ia u Ombudsman.
La pyntip ruh sha ka Iingkashari ia ka jingujor bala mudui da 6 ngut ki dkhot ka kynhun ialehkai ki thei U-23 ka MCA hakhmat ka Meghalaya State Commission for Women (MSCW) ba kynnoh, shah leh kynshlein, shah byrngem bad ka jingbym leh eiei ka MCA ia ki Official bad Support Staff ka kynhun.
Ia kane kajuh ka jingujor la mudui ruh hakhmat u Ombudsman ha ka 8 tarik Jymmang, 2026.
Hadien ki jingshem jong ka MSCW pyrshah ia u Head Coach bad u Team Manager, u James, kum u President ula buh ia u Bah Kharkamni ka jingshah sospon bam ardor ha ka 27 tarik Jylliew, 2026, namar ka jingbuhrieh ia kane ka jingujor bad weng syndon ia u na baroh ki bor treikam.
Hadien kane, u bah Kharkamni ula pyntip ia ka notice ha ka 27 tarik Jylliew, 2026 ba khot ia ka general meeting ba kyrpang ha ka 3 tarik Naitung, 2026, ia kaba u nongmudui ula tynjuh pyrshah.
U Justice Thangkhiew ula shem ba ka jignthung ia u Ombudsman ka dei kaba la leh da ka jingiashim bynta lang u bah Kharkamni bad kiwei, ha ka jingialang ba long ha ka 7 tarik Lber.
“Ki jingleh jong u nongshah mudui No 1 ban pynkylla biang ia kane namar ki jingkynnoh kiba heh da kaba pyrshang ban khmih biang ia ki rai bad ha lyndet jong kiwei pat ki jingshisha ba bud, ha ka jingsngew jong ka Iingkashari, u nongmudui ula pynshisha ia ka case ba donkam ia ka hukum ba shipor ha kane ka khyllipmat” ong ka Iingkashari.
Namar kata, ka Iingkashari kala bthah, “Tad haduh ka sngi ba bud, ka notice ba 27.06.2026 ba khot ia ka general meeting ba kyrpang ha ka 03.07.2026, kan sangeh shuwa ban treikam bad kumjuh ruh ki rai bad ki kam kiba mih na ka jingialang jong ka jingialang jong ka Apex Council ba kyrkieh ba long ha ka 09.05.2026”.
Ka hukum ka bynrap “La pynshai ba u Ombudsman un dang iai bteng ban trei iala ki jong ki kam, kat kum ka riti treikam ka MCA bad kat kum ki ain tad haduh ka sien shong bishar ban wan”.
Ka Iingkashari kala buh ban shong bishar biang ia kane ka mukotduma ha ka 21 tarik Naitung, 2026.
