Shillong, Jylliew 30: U Myntri Rangbah ka Jylla Conrad K Sangma ha ka sngi Ba-ar ula ong ba ki jingpynkylla ia ka rukom treikam ha Garo Hills Autonomous District Council (GHADC) bad ka Jaintia Hills Autonomous District Council (JHADC) ki la iaid shakhmat bad la khmih lynti ba ka Service Rules jong ki tnad yn ialeh ban pynkhreh hapoh ka 1 tarik u Nailur bad la pynwandur ruh ia ka rukom treikam lyngba ka Online System kaba thymmai ban pynkhlain ia ka rukom lum ia ka khajna.
Kine ki artylli ki Council kham mynshwa kila pdiang ia ka jingtyrwa ka sorkar jylla ban ai jingkyrshan pisa da kaba bujli ha kaban wanrah ia ki jingkylla ha kaba iadei bad ki kam synshar bad ki jingkylla ha ka jingpynlut pynsep, ong u Sangma.
“Ngi lah don ia ka jingialang bad ka GHADC bad JHADC, kiba dei artylli ki district council kiba la pdiang ia ka jingtyrwa jong ka Sorkar Meghalaya ban iatreilang bad ka Sorkar Meghalaya ba kan kyrshan ia ki” la ong u Sangma haba iakren bad ki nongthoh khubor.
“Kane ka long ha ka rukom ba ngin ai lypa ia ka pisa na ka khajna kaba kidei ban ioh ban kyrshan ia ka tulop ka jongki, ban pynkhuid ia ki jingsiew kiba dang sahteng katkum ka jingdon ka khajna. Kumta ka jingai lypa ia ka pisa bad ki pat kin pdiang ia ki jingwanrah ia ki jingkylla khamtam eh ha ka rukom pyniaid ia ki kam ki jam bad ka jingpynlut pynsep ia ka pisa, khnang ba ngin lah ban kyntiew ha baroh ki liang ia ka rukom treikam jong ki Council,” ula ong bad ka pynshai, kine ki jingkylla kin ym ktah pat ia ki mat kiba iadei bad ka kolshor.
“Khlem da ngam jylliew ha ki bynta ki bapher bapher jong ka riti dustur, kolshor bad kiwei kiwei ki bynta kiba long kyrpang jong ki District Council, khlem da ka tuklar ia kitei ki bynta” ula bynrap bad ka ong, ba ha ka sngi Nyngkong ula lum ia ka jingialang bad kitei baroh artylli ki District Council ki iatreilang bad ka kynhun jong ka tnad pla tyngka jong ka jylla.
“Nga dap da ka jingkmen ba baroh artylli ki district council ki iatreilang bad ka kynhun pla tyngka ka jong ngi. La kadei ka service rules, jan kumba 18 tylli ki service rules ha man la ki district council kidei kiba la sdang ban iaid shakhmat” ula ong.
“Ngi khmih lynti ba ha ka 1 tarik u Nailur, ki service rules ia baroh ki tnad naka bynta kitei ki artylli ki district council, kin long kiba la pynkhreh ban pyntreikam” ong u Sangma.
Ula ong ba ki service rules ki long kiba kongsan tam, namar ba ki shimkhia ha kaba iadei bad ka jingthungkam, ka jingkyntiew kyrdan bad kiwei kiwei ki bynta jong ka Tnad Personnel, ki long kiba kongsan bha”.
U Myntri Rangbah ula ong, ba ka jingtreikam da ka Online kaba la sdang ban pynwandur ban pynlong ia ka jinglum khajna kaba paka bad ban pynduna ia ka jingsiew da ka lut tyngka. Nuksa, ha Garo Hills, ka jingpynthymmai ia ki Patta, kaba jia man la ka 10 snem, ki dang treikam ban pynlong ia kane ka jingpynthymmai da ka Online, khnang ba ka jinglum kan long kaba ryntih bad kaba treikam bha. Ka jingsiew kan long da ka Online lyngba ki Bank Account, kumta kan duna bha ka jingsiew da ki lut tyngka” ula ong bad ka iathuh ba ia kum katei ka rynsan yn dang thaw ruh na ka bynta ka jingsiew ia ka Professional Tax bad Trading Licence.
“Ia kitei baroh lah dep ban ithuh bad la ia trei ia ka kam da kaba jingiatreilang bad ki District Council, ia kaba ngi khmih lynti ba yn lah ban pynbeit ryntih ia baroh ka rukom pyniaid kam pyniaid jam, ka rukom trei bad ka jingbit jingbiang ha ka pisa pilain jong ki Council,” ong u Sangma.
Ula ong ba ka sorkar ka dang wad ruh ia ki lad ki lynti ban kyntiew ia ka jinglum khajna jong ki Council.
“Ngi dang peit ha ki bynta kumno ban pynbha ia ka jinglum khajna jong ki Council, namar ba ngi lah khmih ha kiba bun ki bynta, la kadei ka jingpynbeit ryntih ia ka dor, la kadei ha ka jingpyndonkam lut ia baroh ki jingdon jingem kaba ki don, baroh kitei kidei kiba long kongsan bha” ula ong.
U Sangma ula pynpaw biang, baroh kitei ki jingwanrah ia ki jingkylla kidei kiba la iaid shakhmat da ka jingmynjur jong ki District Council.
“Khlem da tuklar ia ka rukom treikam kaba man la ka sngi ka jongki ne ha kiwei kiwei ki bynta, hynrei ban btin bad ialam lynti ia ki ha kaba iadei bad jingpynlut pynsep ia ka pisa da ka jingai mynjur ka jongki hi” ula ong.
“Ngi kyrmen skhem ba kine ki sienjam, kine ki jingwanrah ia ki jingpynkylla ha ka rukom kaba pyntreikam da ka Online Portal, da kaba thaw ia ki rukom treikam Online bad ka jingpyndonkam ia ki kor Computer, kan iarap ha kaban kyntiew ia ka rukom treikam jong ki Council bad ban ialam ha kaban wanrah ia ki jingkylla ha ki snem kiban wan” ula bynrap.
 bad ka Jaintia Hills Autonomous District Council (JHADC) ki la iaid shakhmat bad la khmih lynti ba ka Service Rules jong ki tnad yn ialeh ban pynkhreh hapoh ka 1 tarik u Nailur bad la pynwandur ruh ia ka rukom treikam lyngba ka Online System kaba thymmai ban pynkhlain ia ka rukom lum ia ka khajna.){kind=link}