Mynjur ka Sorkar ban weng noh ia ka kyndon thungkam shipor ka MPSC ban pynkut ia ka jingthungkam Adhoc

Shillong, Jylliew 30: Da ka jingthmu ban tehlakam ia ka jingiai bteng ka jingthungkam shipor ne Adhoc, ka Kynhun Myntri ha ka sngi Baar kala ai jingmynjur ban pynkylla ia ki kyndon jong ka Meghalaya Public Service Commission (Limitation of Functions) Regulations, 1972, da kaba pynduh pyndam noh ia ka Regulation 3(f) kaba plie lad ban thungkam shipor ia ki nongtrei.

U Myntri Rangbah ka Jylla u Conrad K Sangma, hadien ba la dep lum ia ka jingialang jong ka Kynhun Myntri, ula ong ba ia katei ka rai la shim ban pynlong ia ka jingthungkam thungjam kaba khuid bad kaba iaid katkum ka jingwan shakhmat.

“(Ngi lah) Mynjur ia ka jingpynkylla ia ka Meghalaya Public Service Commission (Limitation of Functions) Regulations, 1972, da kaba pynduh noh ia ka Regulation 3(f). Kane kadei ka jingpynkylla kaba khraw ha ka kam sorkar da ka jingthmu ban pynlong ia ka jingthungkam thungjam kaba khuid ba suba, kaban long ryntih bad kaba pynshong nongrim katkum ka jingwan shakhmat eh” ula ong.

U Sangma ula ong, ba katei ka kyndon, kadei tang na ka bynta katto katne eh ki jingjia, hynrei kala pynmih pat ia ki kynrum kynram ha ka rukom treikam.

“Ka kyndon jong ka jingthungkam shipor hapoh jong ka 3(f), ha kaba nyngkong eh kadei tang na ka bynta ki katto katne ki daw ki bym lah kiar, hynrei ha ki snem kiba la dep kala lam pynban sha ka jingwanrah ia ki kyrnum kynram bad kala pynjrong ia ka jingthungkam shipor ia ki nongtrei” ula ong.

Da ka jingtreikam mynta jong ki Recruitment Boards bad ka jinglah ban tip lypa ia ka jinglait ki kam, kumta katei ka kyndon kam long shuh kaba donkam.

“Mynta da ka jingdon ia ki Recruitment Board kiba kyrpang, ka jingpynbeit ryntih ia ka rukom treikam ha ka jingthungkam bad ka jingiaid shakhmat ban tip lypa ia ka jinglait kam da kaba ioh lypa ia ka por kaba bun, ka jingdonkam ia ka Regulation 3(f) kala nang hiar bha” ula ong.

U Myntri Rangbah ula pynshai ba ka jingdonkam kyrkieh ban thung nongtrei lah ban shimkhia da kaba thung kam da ka kontrak tad haduh ban da leh dep ban thungkam pura ha ka kam kaba lait.

“Da kaba iaid shakhmat, kino kino ki jingthungkam kiba donkam hok kiba long tang shipor lah ban pyndep lyngba ka jingthungkam da ka kontrak tad haduh ban da lah pyndep ia ka jingthungkam kaba pura”.

Ula ong, ba ka jingpynkylla kan pynskhem ia ka jinglong khuid ka sorkar ha ka jingthungkam.

“Kane ka jingpynkylla kana pynkhlain ia ka rukom treikam ha ka jingthungkam thungjam bad pynthikna ba kan don ka jingpaka bad ka jingkhuid ha ka jingthungkam ia ki nongtrei kiban ai jingshakri ia ki paitbah” la bynrap u Sangma.