Shillong, Jylliew 30 : U Myntri Rangbah Conrad K Sangma ha ka sngi Ba-ar ula pyntip ba ka Jylla kan sa rah iakren bad ka Sorkar Pdeng halor ka jingdonkam ban pynkylla ia ka MMDR Act lane thaw ia kiwei ki kyndon ban pynlong ia ka jingtih marpoh khyndew kat kumka jingstad saian kaba lah ban pyntreikam na ka bynta ki nongtih par kiba rit, haba pynpaw ba ka jingtih open cast ka donkam ia ka jaka kaba heh bad ka jingkynshew pisa kaba bun.
U Conrad ula iathuh ba un sa rah iakren ia kane ka kam bad u Myntri kam Pohiing ka Ri lem bad u Myntri kam tih par.
“Ngan sa iakynduh ia u Myntri kam Pohiing bad u Myntri Mining haba iakren bad ka kam tih par hangne ha Jylla jong ngi” ula ong hadien ka jingialang ka Kynhun Myntri.
Watla ia ka jingkhang tih dewiong lah dep ban weng bad la pyllait ia ka jingtih kat kum ka juk saian da ka Coal India bad ka Mining Ministry, ula ong ba kaei kaba long ba man pat ka iapher bha bad ki nongtih par hangne.
‘Watla ia ka jingkhang tih dewiong lah dep banweng bad watla kala don ka jingmynjur ia ka jingtih par da ka jingstad saian ha ka Jylla jong ngi, kaba la ai da ka Coal India bad ka Mining Ministry bad kiwei ki Agency, ki jingeh ba ngi iakynduh ka dei ka jingtih open cast, ka bym lah ban pyntrei hangne namar ka jingdonkam ia ki jaka bah eh bad ka jingkynshew pisa kaba bun” ong u Conrad.
Ula batai ba bun na ki nongtih par kim lah satia ban kot ia ka bor kumba la buh.
“Namar bun na ki nongtih par jong ngi, ka jaka ka long kaba heh, ka jingkynshew ka long kaba heh, bad ka jingdon syrtap u dewiong ruh ka dei kawei ka bynta. Kumta kala don ka jingsngewkhia na ki nongtih par jong ngi ba ym shah ia ki par kiba rit” ula ong.
U pyntip ba ka Sorkar Jylla kala pule bniah ia ki technology bala tyrwa da ki nongtih par ban lah weng ia kane ka jingeh.
“Ngi la khmih ia ki technology bapher bapher bad ki nongtih par kila wanrah ia ki technology kiba iahap sha ngi. Ngin sa iasam ia kane bad ka Sorkar India” ula ong haba bynrap “Ngi kyrmen ba ngin ioh ia ka jubab kaba sngewtynnad”. Hynrei u Conrad ula maham ba ki kyndon ba buh hapoh ka Ri ki dei kiba buh ha ka jingeh ia kiei kiei baroh.
