Mudui ka KSU sha u DC halor ka jingiaid Muharram | Kdew ia ki jingsawa ha ka por miet, dheng kali bad jingshngain

Shillong, Jylliew 30 : Haba kynnoh pynkhein ia ki hukum ki bor District bad pynthut ia u paidbah, ka Khasi Student’s Union (KSU) Laban Circle kala thoh sha u Deputy Commissioner ka East Khasi Hills ba dawa ban leh eiei pyrshah ia ki nongpyniaid ia ka jingiaid Muharram bala pynlong ha Laban ha ka taiew bala lah.

Ha ka shithi bala phah ha ka sngi Ba-ar, ka KSU kala ong ba kala “pynpaw ia ka jingsngewkhia halor ka jingujor ba ka ioh pdiang pyrshah ia ka jingiaid Muharram ha Laban ha ka 26 tarik Jylliew, 2026 (sngi Thohdieng)”.

“La pyntip ba ki nongiaid Muharram kila pynthut ia ka suk ka sain jong ka thain, pynthut ia ka leit ka wan ki kali bad buh ha ka jingbym shngain ia ka leit ka wan ki briew” ong u President ka Laban Circle Jason Laloo bad General Secretary Shining Star Chyne ha ka shithi.

Kat kum ka jingong ka KSU, ia kane ka jingiaid paidbah la pynlong ha ka 25 tarik Jylliew na red Cross, Laban sha ka thain St.John, Lower Lumparing bad wanphai pat sha kajuh ka jaka bad ha ka 26 tarik pat na Red Cross, Laban sha lad Civil Hospital kaba iaid lyngba ka Oxford Hill, KOR, Last Stop bad Rhino Point hashuwa ban wan phai pat sha Red Cross Laban.

Ka KSU ka ong ba kine ki jingiaid paidbah ki dei ban kut ha ka por 9:30 baje mynmiet “ kat kum ka hukum bala ai da ka Ophis u Deputy Commissioner” hynrei “kila bteng haduh ka por 11 baje mynmiet, kumta ka dei ka jingpynkhein ia ka hukum jong ki bor District”.

Ka shithi ka ong ba ka Seng kala ioh pdiang ia ki jingujor na ki khynnah pue ha Laban, KOR bad Lower Lumparing “haba iadei bad ka jingtem ksing kaba sawa jam bad jingiakhot Blei ha ki bynta ba khatduh jong ka jingiaid paidbah, kaba la ktah jur ia ka jingpynkhreh jong ki khynnah ia ki eksam shiteng snem”.

Ka KSU kala pynpaw ruh “ia ki jingiashad ha surok ba pyndonkam ia ki wait bad ka ding” ha kane ka jingiaid paidbah kaba la iashimbynta da ki spah ngut ki briew”.

Ka Seng ka ong ba kum kine ki jingleh ki dei kiba don jingma shibun bad bynrap ba “ki don ki nongleit nongwan kiba la mad ia ka jingsied ki phylliah ding, kaba long ka jingsngewkhia kaba jur”

Ka jingiaid jingieng ki kali ruh ka dei kawei ka mat bala pynsngew.

Ka Seng kala ong ba kane ka jingiaid paidbah kala pynthut ia ka iaid ka ieng ki kali khamtam ha ki surok kiba khapngiah ha kine ki kala bala pynpaw.

Haba pynskhem ba ka seng ka burom ia baroh ki niam bad ka hok jong ki briew ban lehniam, ka KSU ka ong ba “kam kyr shan iakino kino ki kam kiba ktah ia ka suk ka sain, jingshngain bad ka jingiada ia ki nongshongshnong”.

Ka Seng ka kyntu ia ki bor district ba kin leh eiei pyrshah ia ki nongpyniaid ia kane ka jingiaid paidbah khnang ba kum kine ki jingpynthut kin nym jia shuh hadien habud.