Shillong, Jylliew 26: Kum shi bynta ban ialeh ban kyntiew ha kaban pynneh pynsah ia ki mrad, ka Meghalaya State Zoo bad ka Khasi Hills Wildlife Division hynne ka sngi Thohdieng kala pyllait ia u Chinese Pangolin (kyrbei) bad ia u Asian Palm Civet hapoh ka Nongkhyllem Wildlife Sanctuary hadien ba kine ki ar tylli ki mrad kila pyndep ia ka jingioh sumar bad ka jingshah khmih bniah ha ka tnad Veterinary.
Kane ka jingpyllait ka long kaba kongsan ha kaba kine ki ar tylli ki mrad kin ioh ban im hapdeng ka sawdong sawkun jong ka mei mariang.
U Chinese Pangolin udei u mrad uba don ha ka thup jongka “Critically Endangered” jongka IUCN bad u long kum u nongtehlakam ia ki khniang ia kaba la tip ruh kum u “ecosystem engineer” da kaba bam ia ki dkhiew bad ia ki kruin, kaba iarap kylla ha kaban iada ia ki jingthung bad ia ka jingsniew jong ka khyndew.
Katba u Asian Palm Civet udei u mrad uba iarap ha kaban pynsaphriang ia ki symbai ha kylleng ki bynta, ban kyrshan ia ki jingim kiba don ha ka sawkun sawkun jong ka mariang bad ban pynkhie biang ia ki khlaw ki btap.
Ki ophisar ka tnad Forest kila ong, ba u Chinese Pangolin la ioh ban pyllait im da ki nongtrei jongka Nongpoh (Wildlife) Range na ka surokbah NH-6 hajan Jiva Restaurant, Nongpoh.
Katba ia u Asian Palm Civet pat la ioh ban pyllait im, dang shen na Jaintia Hills bad ula don hapdeng ka jingmynsaw. Ia kine baroh ar tylli ki mrad la rah noh sha Meghalaya State Zoo ban ioh ia ka jingsumar bad ka jingshah khmih bniah.
Hadien ba ki riewshemphang jong ka Veterinary kila pynthikna ba kila long kiba bit ba biang ban pyllait noh, kumta ia kane ka kam la pyndep pat da Meghalaya State Zoo bad Nongpoh (Wildlife) Range hapoh jongka Khasi Hills Wildlife Division.
U Chief Conservator of Forests (Wildlife) bad CEO ka Meghalaya Zoo Project Implementation Society, u PK Agrahari bad Meghalaya State Zoo Director u Pavan Khade kila ia donlang ryngkat bad ki heh ophisar na ki tnad bapher bapher.
“Ka jingpyllait im ia ki mrad khlaw, ka jingai jingsumar bad ka jingpyllait biang ia ki kadei ka bynta kaba kongsan ha ka jingpyrshang ban ialeh ban pynneh pynsah ia ki mrad khlaw” la ong u Agrahari.
Ula pynpaw ba ki Chinese Pangolin kidei kiba la ioh ia ka jingiada katkum ka Schedule-I jongka Wild Life (Protection) Act, 1972, kaba ai ia ka kyrdan kaba heh tam ban ioh jingiada na ka aiñ.
“Hynrei kine ki jait mrad ki mad ia ka jingma kaba khraw na ka jingkhaii be-aiñ ia ki mrad khlaw bad ka jingduh noh ia ki jaka shong jaka sah ki jongki” ula ong.
U Agrahari ula bynrap ba kane ka jingseisoh ha kaban pyllait ka pyni ia ka jingiengskhem ka tnad na ka bynta ban pynneh pynsah ia ki mrad khlaw bad na ka bynta ka bha ka miat jong ki mrad.
Ula kyntu ia ki paitbah ba kin pyntip sha ka tnad shaphang ki mrad khlaw kiba don hapdeng ka jingpang jingshitom khnang ba yn lah ban ai jingsumar ia ki bad ruh ban ioh ban pyllait biang ia ki.
Ki Pangolin kidei ki mrad kiba jur bha ha ka jingshah khaii be-aiñ ha ka pyrthei baroh kawei, kaba la kot haduh 20% bad la antad ba kila don haduh shi million tylli ki Pangolin kiba la shah kem ha ka pyrthei baroh kawei ha kine ki 10 snem kiba la dep.
Ha Meghalaya, ka Tand Forest kala lap ba kila don 7 tylli ki jingjia jong ka jingkhaii be-aiñ ia ki Pangolin bad ia ki snep jong ki Pangolin ha ki 5 snem kiba la leit bad la pynngat ia kiba leh ia katei ka kam khaii be-aiñ hapoh jongka Wild Life (Protection) Act, 1972.
 bad ia u Asian Palm Civet hapoh ka Nongkhyllem Wildlife Sanctuary hadien ba kine ki ar tylli ki mrad kila pyndep ia ka jingioh sumar bad ka jingshah khmih bniah ha ka tnad Veterinary.){kind=link}