Guwahati, Jylliew 26: Halor ka shah kynnoh ba pyniaid ia ka kam khaii met hapoh ka massage parlours, ki pulit ka Cachar ki la kem ïa 28 ngut ki kynthei ha ka por ba ki khynra ïa ki ar tylli ki massage parlours ha ka sor Silchar ha Assam bad ki dang tohkit ïa ka kam khaii met kaba lah ban don jingiadei hapdeng ki jylla bad kiwei jaka khem met.
Ia kine ki jingkhynra la pynlong ha ka miet jong ka sngi Palei hadien ka jingtip na ki tnad syntiat bad ka jingtohkit kaba bniah halor ki kam be-aiñ ba la kynnoh ha ki jaka khem met ha Silchar bad sawdong jong ka.
U Additional Superintendent of Police (Crime), Cachar u Rajat Pal haba ïakren bad ki nongthoh khubor u la ïathuh ba ha kaba nyngkong la kem ïa kitei ki kynthei bad hadien pat la kem hadien ba la register ïa ka mukotduma ha Silchar Sadar Police Station.
“Baroh ki la rah sha district court shah bad ngi la pan ia ka custodial remand jong ki,” la ong u Pal.
Ia kine ki kynthei kiba la shah kem la pynngat ha ki katto katne ki kyndon jong ka Bharatiya Nyaya Sanhita (BNS), kynthup ia ki jingshah kynnoh ba iadei bad ka jingleh thok, ki kam lehbein, ka jingshah thombor ne ka jingpyndonkam bor pyrshah ia u nongtrei sorkar, ka jingpynthut ia ki paidbah bad ki kam runar ba la pynbeit lypa.
Ki pulit ki la pyndonkam ruh ia ki kyndon Immoral Traffic (Prevention) Act, 1956, kynthup ia ki bynta kiba iadei bad ka jingpyniaid ia ka jaka die met, ban im na ka kamai na ka kam khaii met, ka jingkhaii met hajan ka jaka paidbah bad ka jingpan pisa.
Ki trai jong kitei ki ar tylli ki spa centre ruh ki la shah pynngat hapoh katei ka juh ka Act.
Katkum ki pulit, kiba bun na ki kynthei kiba la shah kem kim dei ki nongshong shnong jong ka Silchar.Ki kot ki sla kiba la ioh kurup ha ka jingtohkit ki pyni ba katto katne ngut ki dei na ki District kiba kynthup ia ka Jorhat, Sonitpur bad Kamrup ha Assam, katba arngut ki kynthei ki dei na Dimapur, Nagaland.
Ki pulit ki suba ba bun na ki kynthei ki lah ban dei hi ki nongshah lehbein ha ka jingshah khaii.
“Ngim kyntait ba ka lah ban don ka jingshah khaii briew hapdeng ki jylla.Bun na ki kynthei ki dei kiba nabar jong ka thain bad ka jingtohkit ka dang wad bniah hato la wanrah ia ki shane lyngba ki kynhun ba la pynbeit lypa ne ki network,” la ong u Pal.
Kane ka jinglap ka long hapdeng ka jingsngewkhia kaba nang jur halor ki kam be-aiñ ba la kynnoh ba la pynlong ha ka kyrteng jong ki spa bad ki massage centres ha ki jaka sor jong ka Assam. Ki nongtohkit ki dang pyrshang mynta ban pynthikna ia ka jingheh jong katei ka network bad hato ki kam kiba kum kine ki treikam shawei pat ha katei ka thain.
