Shillong, Jylliew 26 : U Myntri ka tnad Pule Puthi Bah Lahkmen Rymbui ha ka sngi Thohdieng ula kyntait ia ka jingkam ba ka Sorkar kala pyntroin ia ka kam pule dangle, haba ban jur ba ki jingpynkylla ba dang iaid mynta ki dei kiba thmu ban pynbeit ryntih ia ka rukom treikam baroh bad ban pynbha ia ki skul bad college.
Ula kynthoh ia kane halor ki jingkam jong ka kynhun ba ialam da u MLA ka VPP bah Brightstarwell Marbaniang halor ka jinglong jingman ka jingai jingshakri bad ka jingsiew ia ki deficit grant-in-aid college.
U Bah Rymbui ula ong ba ka kynhun kala pynsngew ia ka jingsheptieng ba ka Sorkar ka “pyrshang ban pyntroin ia ka kam pule dangle da kaba pynduh noh ia ki kyndon ka UGC”.
“Nga la batai ha ki ba ka Sorkar, ha ka jingshisha, ka pyrshang ban pynbeit ryntih ia ka pule dangle baroh kawei, la ka dei ka pule dangle ha ki skul lane ki college” ong u Bah Rymbui. “Ngi la iaid ha ka lynti ha kaba ka jingthmu ka long ban tei ia ka rukom pyniaid kaba biang eh ha ka pule puthi na ka bynta ka Jylla”.
U iathuh ba ka Sorkar kan sa shong bishar bha ia kane ka kam. “Katto katne ngut ki nonghikai kila ia kynduh ia nga bad nga la ong ha ki ba ngin sa bishar bha ia ka kam bad ban leh ia kaei kaba bha eh na ka bynta ka Jylla bad ia ka kam pule dangle” ula ong.
Halor ki jingujor ba katto katne ki college ki khlem pynmih jingpynbna ia ki kam nonghikai, u Myntr ula ong ba ka jingpyniaid ia ki college kam dei ka jingkitkhlieh jong ka Sorkar. “Ki college kim dei kiba pyniaid tang da ka Sorkat, ki dei ruh kiba pyniaid da ki society lane ki governing body. Ki dei ban khmih iala ki jong ki rukom pyniaid kam” ula ong.
“Ngin tuklar satang lada don ka jingbym biang ha ka jingai ia ki jinghikai. Lem kumta, ka Jylla hi kam ju tuklar” ula ong.
U Bah Rymbui ula pynshai ba ia ki kyndon ka UGC la pyntreikam mynta na ka bynta ka jingthungkam thymmai. “Baroh ki nonghikai ha ki college kim hap ban pynbiang ia ki kyndon ka UGC” ula ong. “Ia ki kyrtong riew, ka kyrdan post graduate degree da 50% marks kala biang eh ban thungkam bad ki lah ban ioh ia kiwei ki jingmyntoi ba ai ka UGC kiba la pyntreikam da ka Jylla”.
