Shillong, Jylliew 26: Haba kynnoh ba kam don satia kano kano ka jingtip shaphang ki nongïoh jingmyntoi watla ka don ka pisa ba palat T.400 klur hapoh ka Meghalaya Environment Protection and Restoration Fund (MEPRF), ka Jaiñtia National Council (JNC) ha ka sngi Thohdieng, ka la dawa iaka Sorkar ban leh sorjamin lane lum jingtip ïa ki longïing kiba shah ktah na ka jingtih dewïong bad ban ai noh mardor ïa ki jingïarap.
Ka JNC haka jingïalam u president u Bah Sambormi Lyngdoh ka la ïakynduh ïa u MLA ka Khliehriat constituency u Bah Kyrmen Shylla uba dei ruh u Adviser jong ka tnat Mining and Geology ban aiti daka dorkhas halor ka MEPRF.
Ia ka mang tyngka (Fund) hapoh ka MEPRF la thaw hadien ba ka National Green Tribunal (NGT) ka la khang ban tih dewiong ha u snem 2014, ha kaba ki kyndon ki bthah ba dei ban buh kyrpang 10 percent na ka jingioh lum khajna na ka challan shalan dewiong na ka bynta ban pynbha ia ki jaka ba la shah pynjulor ha ka jingtih dewiong bad ban iarap ia ki longiing kiba shah ktah.
Ka JNC ka la ong ba ki jubab RTI ki pynpaw ia ki jingduna haba pynshai halor ka MEPRF.
“Ka jubab lyngba ka RTI ka ïathuh ba kum kine ki jingtip ‘ym don’ haba la buh jingkylli shaphang ka jingdon jong ki longïing kiba shah ktah kiba la ïoh jingïarap bad ki lad pynbha iaki par dewiong ba la shim da ka tnat Mining and Geology” ong ka JNC.
“Ka jinghiar ka kamai kajih ha East Jaiñtia Hills bad ha kylleng ka jylla Meghalaya hadien ka jingkhang tih dewiong ka long kaba la tip lut baroh” ong u Bah Sambormi.
“Hynrei ka long kaba kongsan kumjuh ba ïa ki pisa ba la thaw kyrpang na ka bynta ban iarap pat ïa ki briew kiba shah ktah dei ban pyndonkam katkum bala thmu”.
U la bynrap ba ka jingthmu jong ka MEPRF ka kynthup ia ka jingiada bad jingpynbha ia ka mariang, hynrei ka jubab bala ioh naka RTI ka pyni ba kam don ka jingkitkhlieh. “Lada don ka pisa hapoh ka MEPRF, ka dei ban poi sha ki nongioh jingmyntoi kumba la thmu. Dei ban don ka jingshai bad ka jingkitkhlieh ha ka jingpyndonkam ia ka pisa. Ngi kut jingmut ban wad bniah kumno la pyndonkam ia kane ki pisa” ula ong.
Ka JNC ka la kdew ba Chief Secretary dang shen u la kam ïa ka jingdon bad jingthmu jong ka mang tyngka ha ka jingïakynduh bad ka Association jong ki nongtih dewïong.
“Ïa kane ka kam ngin shim khia bha bad ngin rah ha khmat u Myntri ba dei peit ïa ka tnat Mining and Geology ban leh ïa kaba donkam” u la pynthikna.
Ka JNC ka la ong ba kan dang iai bteng ban pynbor ban iada ia ki paidbah kiba shah ktah namar ka jingshah khang tih dewiong bad ban pyndonkam hok ia ka MEPRF katkum ka jingthmu.
, ka Jaiñtia National Council (JNC) ha ka sngi Thohdieng, ka la dawa iaka Sorkar ban leh sorjamin lane lum jingtip ïa ki longïing kiba shah ktah na ka jingtih dewïong bad ban ai noh mardor ïa ki jingïarap.){kind=link}