Shillong, Jylliew 17: Ka Liang Pyrshah All India Trinamool Congress (AITC) hynne ka sngi thohdieng, kala kynnoh ba ka Sorkar Meghalaya Democratic Alliance (MDA) ba ialam daka NPP kam shym la lah ban kner ia ki kti jingiarap sha ki lanot shlei um ha Ri-lum Garo.
“Ka jingther slap ba khlem sangeh ha kine ki laisngi kala sei madan ia ka jingbym biang ki lad jingiada hapoh ka Jylla. Sa shisien, ka Jylla kaba ioh ia u slap ba jur eh,kam shym la lah ban iada iala ki nongshongshnong na kane ka jinglynshop ki bor ka mariang kaba ju jia manla u snem” ong ka AITC ha ka kyrwoh khubor.
Ka AITC kala ong ba ha Mawphlang, saw ngut ki briew kila iap na ka jingtwa khyndew. Ha Ri-lum Garo ruh, ka jingtwa khyndew kala jia bad pyndkut lut ia ka leit ka wan na ka jingjulor ki surok.
KI jaka ba shah ktah ki kynthup ia ka Aknonggre kaba don ha South Tura, Gadaruggre bad Daddenggre. Ki paidbah kim shym la ioh ia ki jaka sah ba shipor ha ki skul naba ki skul ruh kila ngam ha ka jingshlei um.
“Ka Sorkar MDA ba ialam da u Conrad kala pyni biang ia ka jingbym salia ban kner ia ki lad jingiarap hynrei dei ka Meghalaya TMC kaba la mih shakhmat ban leh ia kane ka kam. Ha Lukiacher bad Merengipara, ka TMC kala sam ia ki umdih, khaw bad ki biscuit ia ki briew ba shah ktah” ong ka AITC.
Ha Mahendraganj, ka MLA Dikkanchi D Shira kala sam ia ki song jigiarap sha ki longiing kiba la kylla lanotna ka jingshlei um.
