Shillong, Jylliew 17 : Ka Ryntih ka la ioh ban thep haduh 3-0 kol ia ka Malki ha ka sngi balai jong ka Shillong Premier League kaba long ha ka janmiet sngi Thohdieng ha madan Third Ground Polo.
Ia ki kol jong ka Ryntih ha kane ka sngi la ioh ban thep da u Badonkupar Marbaniang tang ha ka minit kaba 15 jong ka kylla step bud pat sa ka kol na u Hardy Cliff Nongbri ha ka minit kaba jan kut artad jong ka kylla step lyngba ka Penalty kaba pynlong ia ka Ryntih ban ioh lamkhmat lypa haduh 2-0 kol tang ha ka kylla step.
Ka Malki ha kane ka sngi ka la hap ruh ban ialehkai tang 10 ngut naduh ka kylla step hadien ba uwei na ki rangialehkai jong ka, u Heisnoki Syngkon u la shah beh noh napdeng madan hadien ba u la pynur ia u Robert Khongjoh.
Ka jingiakhun ha ka kylla miet ka la nang itynnad shuh shuh namar ka Malki watla ka don sa tang 10 ngut hynrei ka la iakhun tyngeh ban ioh thep kol. Pynban hapdeng kitei ki jingpyrshang, ka Ryntih sa shisien pat lyngba u Badonkupar ka la ioh biang ban thep sa shi kol ha ka minit kaba 64 kaba la pynskhem syndon ia ka Ryntih ban khur ia ki lai point ha katei ka sngi.
U Badon ha kane ka sngi u la dei ban ioh thep sa shii kol ban khur hat-trick ha ka minit kaba 87 hynrei ka kol kaba u khyrwit kam shym la iohlad satia ban pynkhih ia ka jar jong ka Malki kaba pynlong ia ka kynhun ban jop suk da kitei ki 3-0 kol.
Ka jingiakhun ha kane ka sngi Saitjain kaba dei ruh ka lympung iakhun ba khatduh jong ka kylla ba nyngkong kan long hapdeng ka Rangdajied United kaba dei ka kynhun ba wan ba ar ha u 2019 pyrshah ia ka Mawkhar ka kynhun kaba dang shu kiew kyrdan mynta u snem.
