Guwahati, Jylliew 26: Ka National Investigation Agency (NIA) ka la pynngat case ïa ki 11 ngut ki riew shimet halor ka jingkynnoh ba ki don ka jingthmu ban pynïar ïa ka network jong ka kynhun lehnoh Jama’atul Mujahideen Bangladesh (JMB) ha kylleng ka West Bengal bad ka thaiñ Shatei Lammihngi, kynthup ka Assam bad Tripura.
Ïa ka chargesheet la mudui hakhmat ka NIA Special Court in Guwahati katkum ki kyndon bapher bapher jong ka Bharatiya Nyaya Sanhita (BNS), 2023, bad ka Unlawful Activities (Prevention) Act, 1967.
Katkum ka jingong jong ka NIA, ki jingtohkit ki la pynpaw ba kitei ki nongshah kynnoh ki donkti bad ka Imam Mahmuder Kafila (IMK), ka tnat treikam jong ka JMB kaba la kynnoh ba la thaw ban pynsaphriang ïa ka jingmut jingpyrkhat ba shyrkhei jong ka seng ba la khang pyrshah ha India, ban pynlong radbah ïa ki samla bad ban pynïar ïa ka jingtreikam jong ka.
Ka agency ka la ong ba u dkhot ba rangbah jong ka JMB, u Imam Mahmud Habibullah, u la thaw ia ka IMK ban pyniaid shaphrang ia ka jingthmu jong ka seng halor ka khyndew ka shyiap jong ka ri India. Ki nongtohkit ki la lap ba la kynnoh ba ki nongshah kynnoh ki la wad ban pynkhlain ïa ka jingïadei jong ka IMK/JMB lyngba ki jingïalang ba rieh, ki prokram hikai niam, ka jingpynphriang ïa ki kot kiba shyrkhei bad ka jingpyndonkam ïa ki lad digital ban pynphriang ïa ki jingpynbna pyrshah ïa ka India bad ban kyntiew ïa ka jinglong ba ïaineh ha ki nongïalam jong ka seng.
Napdeng kito kiba la shah kynnoh, la ithuh ia u Nasimuddin kum u briew ba kongsan uba ialam ia ki kam jong ka seng IMK ha Assam, katba u Jagir Mia la kynnoh ba u dei u khlieh jong ki kam jong katei ka seng ha Tripura.
Ka NIA ka la ong ba ka la lap ia ki kot ki sla, ki tiar electronic bad ki jingthoh digital ha ka jingtohkit, kaba long ka nongrim jong ka jingshah kynnoh pyrshah ia u nongshah kynnoh.Ka jingtohkit halor katei ka kam, kaba la register kum ka RC-01/2026/NIA/GUW, ka dang iaid shakhmat, la bynrap shuh shuh katei ka agency.
 ka la pynngat case ïa ki 11 ngut ki riew shimet halor ka jingkynnoh ba ki don ka jingthmu ban pynïar ïa ka network jong ka kynhun lehnoh Jama’atul Mujahideen Bangladesh (JMB) ha kylleng ka West Bengal bad ka thaiñ Shatei Lammihngi, kynthup ka Assam bad Tripura.){kind=link}