Shillong, Jylliew 25 : Ka Sorkar Meghalaya kala pynmih ia ka jingpynbna bala pyntreikam ia ka Meghalaya Vehicle Scrappage Policy, 2025, hynrei kam mut pat ba man ki kali bala tynmen ha ka Jylla kin shah pynlong mar jot noh. Hynrei, ka policy ka wanrah ia ka jingtreikam ban ithuh ia ki kali ki bym long shuh ban iaid ha ki surok bad ban pynthikna ba dei ban pynjot noh iaki bad recycle pat.
Hapoh ka policy, ki kali Sorkar kiba la pyndep ia ka 15 snem ka jingshakri, ki kali kamai kiba la dap 15 snem bad ki kali shimet kiba la pyndep 20 snem la ithuh kum ki End-of-Live Vehicles (ELVs), kaba mut bala kut ka por ia ki ban iaid. Hynrei, tang ka jingtam ia ka snem kam mut pat ba dei ban pynlong mar jot noh ia ki kali. Ki kali kiba dang lah ban iaid, kiba pass ia ka fitness test bad don ia ki registration kiba treikam, ki dang lah ban iaid ha ki surok.
U Symbud Myntri Rangbah ba khmih ia ka Tad Transport Bah Sniawbhalang Dhar ula ong ba ka Sorkar Meghalaya ka dang pynkheh ia ki ban ban pyntreikam ia ka Vehicle Scrappage Policy 2025 bad thmu ban pyntreikam noh ia ka hashuwa ban kut une u snem. Ula kubur ba ka jingbuh ia ka rukom treikam kan shim por, hynrei pynpaw ia ka jingsngew skhem ban lah pyntreikam noh hapoh u 2026.
U Bah Sniawbha ula ong ba ia ki jingtip kiba bniah shaphang ka policy, kynthup ia ka jingdon ki kali kiban pynlong marjot noh mynta u snem, yn sa pynbna hashuwa bala dep pynbeit ia ka rukom treikam.
Ia ka kali lah ban pynlong mar jot noh lada kam pass ia ka fitness test, ka don ia ki registration bala pynduh pyndam lane ka bym shym la register shuh. Ka policy ka kynthup ruh ia ki kali kiba la julor haduh bym lah shuh ban maramot namar ki jingjia aksiden, jingshlei um, pluh lane kino kino ki jingjulor na ki bor ka mariang, kumjuh ruh kiba la shu ieh, bala kurup lane kali ba die lilam. Ki trai kali ki lah ruh ban wan aiti hi dalade ia ki kali ban pynlong marjot noh.
Ban ithuh ia ki kali ki bym long shuh, ka Sorkar ka thmu ban pynieng ia ki Automated Testing Station (ATS) ha kylleng ka Jylla Meghalaya. Kine ki centre kin pyndonkam ia ki kor computer ban khmih bniah ia ki kali naduh ka rukom treikam ki brake, steering, suspenson, jingpynmih tdem bad kiwei ki bynta ba wanrah ia ka jingshngain jong ki kali. Ki kali ki bym pass ia kine ki test bad bym lah shuh ban pynbha ba kin long kiba shngain, yn sa pynbna noh kum ki End-of-Life Vehicle.
Shisien bala pynbna ia ki kali ba kim long shuh ban iaid, yn sa rah ia ki sha ka Registration Vehicle Scrapping Facility (RVSF) bala ai jingmynjur da ka Sorkar. Shuwa ban pynjot ia ka, ka RVSF kan pynthikna ia ki trai bad ki jingtip ba bniah shaphang ki kali lyngba ka VAHAN database bad pynthikna ba kane ka kali kam dei kaba shah tuh lane don bynta ha kino kino ki kam bymman.
Hadien ba pynshisha, ia ka registration jong ka kali yn sa pynduh pyndam noh lyngba ka VAHAN portal. Ka RVSF kan sa weng noh ia ki mar kiba ktah ia ka mariang kum ka umphiang, ka umphniang engine, battery, ka umphning brake bad coolant shuwa ban pynpra ia ka kali.
Ia ki mar kiba dang lah ban pyndonkam biang, yn sab uh la ka jong katba ia ka met jong ka kali yn sa tar lyngkhot lyngkhai bad recycle ia ka. Ki tiar kum ki steel, aluminium, copper bad plastic yn s alum lang katba ia ki mar kiba don jingktah yn sab ret ia ki kat kum ki kyndon iada mariang.
Hadien bala pyndep ia ka jingpynkylla mar jot, ki trai kali kin ioh ia ka Certificate of Deposit bad ka Certificate of Vehicle Scrappage. Ia kine ki syrnot yn lah ban pyndonkam ban ioh ia ki jingmyntoi haba thied kali thymmai ha ka por ba ka Sorkar ka pynbna ia ki kynja skhim. Ki trai kin ioh ruh ia ka dor bala mynjur ban pynkylla marjot ia ki kali n aka RVSF.
Ka policy ka kren ruh ia ka jingbuh ia ka Registered Vehicle Scrapping Facility (RVSF) ha Meghalaya. Ki nongpyniaid kin hap ban ioh ia ka jingmynjur na ka tnad Transport, Environmental Clearance, Pollution Control Permission, GST bad Pan Registration, bad ban bud ia ki kyndon jingshngain, labour bad cyber security. Ka registration haba sdang kan treikam tang 10 snem bad lah ruh ban pynthymmai.
Ka Ophis u Commissioner of Transport kan long kum ka nodal agency ba hap ban pyntreikam ia ka policy, ban ai jingmyjur ia ki RVSF bad pynthikna ba kin bud ia baroh ki rule bad ki kyndon iada mariang kiba la buh.
Kat kum ki kot ki sla ka policy, ka Meghalaya ka don palat ia 5.54 lak tylli ki kali bala register, bad ka Shillong ka dei kaba don buh eh. Ka Sorkar ka ong ba ka policy ka thmu ban pynduna ia ka jingpynjaboh, wanrah ia ka jingshngain ha ki surok, pynshlur ia ka jingpyndonkam ia ki kali ba pyndonkam ia ki umphniang kiba khuid, recycle ia ki tiar jong ki kali bad aikam aijam ha ka automobile recycling sector.
Ka Meghalaya Vehicle Scrapping Policy kam dei ka hukum ban weng ia ki kali tunmen na ki surok. Ka dei ka lad pyrrkhing ban ithuh ia ki kali ki bym long shngain shuh lane kibym ibit shuh ban iaid ha ki surok.
