Shillong, Nailar 10 : Ka Meghalaya High Court ha ka sngi Nyngkong, kala pynwai noh ia ka PIL ba kyrpad ban pynsangeh ia ka jingpom dieng ha Lower New Colony, Laitumkhrah, da kaba ong ba ki ain khlaw ba don mynta bad ki rules kila biang eh ban khmih ia kane ka kam.
Ka division bench u Justice HS Thangkhiew bad W Diengdoh kala pynwai noh ia ka PIL bala mudui da u Geraldine G Shabong.
Ka mudui kala kyrpad ban pynsangeh ia ki jingai jingbit ban pom dieng bad ban thaw ia ka Expert Committee ban khmih bniah ia ki dieng hashuwa ban pom ia ki.
Haba bishar, ka Iingkashari ha u snem 2025 kala bthah ia ka Jylla ban pynjyrngam biang da kaba thung ia ki dieng ha ki jaka ba pom beain ban ban ai ia ki jingtip ba bniah ia ki aplikeshon pomdieng ba dang sahteng.
Kala hukum ruh ban thaw ia ka committee ki lai ngut ki dkhot ki ban ai jingmut ia ka Sorkar bad ban bishar ia ki aplikeshon.
La phah wanrah ia ka jingbthah jong ka Committee ha u Naiwieng 2025 hadien ba ka Jylla ka pyntip ba ia kane ka kam lah pynhap hapoh ki Act, Rules bad ki kyndon ka Supreme Court kiba don lypa. Namar kane, ka Iingkashari kala bthah ia ki bor khmih ba kin bud thikna ia kine ki kyndon.
U Advocate General A Kumar ula pyntip ba kam don shuh kano kano ka SLP ba dang sah pyrshah ia ka hukum ba pynmih ha u bnai Naiwieng.
U nongiasaid ain jong u nongmudui ula pan por, hynrei ka IIngkashari kala ong ba ia kane ka kam ym lah shuh ban nang pynjlan bad pynwai syndon ia ka PIL.
