Shillong, Jylliew 25 : Ka Enforcement Directorate, Shillong Sub-Zonal Office kala kurup shipor ia ka iing ba T.40 lak jong u MLA barim ka GHADC haba iadei bad ka jingkynnoh bam klop ia ka pisa kam pynroi jongka Council.
Ia kane ka jingkurup la leh ha ka 24 tarik Jylliew hapoh ka Prevention of Money Laundering Act, 2002.
Kane ka Iing, kaba don ha ka kyrteng u Ismail R Marak, MDC barim ka Asanang Constituency, la kurup kum ka jingpyndonkam da ka pisa bala bam klop ia kaba la lapdien da ka Agency.
Ka ED kala pynlong ia ka jingtohkit haba pynshong nongrim ia ka chargesheet bala ujor ha ka 18 tarik Jymmang, 2023 hapoh ka Iingkashari Special Judge, Prevention of Corruption Act, West Garo Hills, Tura.
Kane ka case kala mih na ka jingujor sha ka Meghalaya Lokayukta No. 01/2019 bad kynthup ia ki jing kynnoh ba shah pynsajia hapoh ka kyndon 7A, 12 bad 13 jong ka Prevention of Corruption Act, 1988.
Kat kum ka jingong ka ED, ka jingtohkit la shem ba na ka T.28.66 klur ka “Grant for Excluded Areas” bala ioh pdiang da ka GHADC, T. 1 klur la mang na ka bynta ki 49 tylli ki project kam pynroi hapoh ka Asanang Constituency.
Kala kynnoh ba pynkhein ia ka Meghalaya Financial Rules, 1981, bad ka avance ba 60% na ka pisa bala mang sha ka kam, la pynlait shaki arngut ki contractor, Kubon Sangma bad Nikseng Sangma.
Ia kine ki work order la kynnoh pynioh da kaba shu soi thok, watla ia ka project ym shym la pyntreikam satia katba ia ka pisa pat la shu ia bam klop.
Ka jingtohkit PMLA kala lap ia ka pisa jong kane ka kam bymman ba kot haduh T.50.60 lak,la phah da u Ismail R Marak sha ka kurim ka Pratibha Marak.
Ka Agency ka iathuh ba u Marak ula ioh T.19.60 lak da ka pisa katba T.33 lak la phah sha ka account jong ka kurim, kaba la pyniaid lyngba ki account jong ki contractor.
Haka jingtohkit ba hashuwa, ka ED kala kurup ia ka bank accont ba don pisa kumba T.16.38 lak hapoh ka kyndon 17(1A) jong ka PMLA.
