Shillong, Jylliew 25: U Election Commissioner of India Dr Vivek Joshi u la bishar bniah ia ka jingpynkhreh ka Jylla ban leh ia ka Special Intensive Revision jong ka electoral roll, da kaba pynlong ia ki jingialang ha ki District bad jurip ia ki jaka thep vote ha Meghalaya.
Ha ka jingwan jurip ha Ri-Bhoi district ha ka 23 tarik Jylliew, u Dr Joshi u la ia kren bad ki District Election Officer, Electoral Registration Officers, Assistant Electoral Registration Officers bad kiwei ki ophisar.
Ka jingbishar bniah ka la pynshong nongrim ha ka buit pyntreikam na ka bynta ka SIR, da kaba pynleit jingmut ha ki prokram ai jinghikai na ka bynta ki Booth Level Officers, EROs, and AEROs.
U Election Commissioner of India u la bteng ia ka jingpeit bniah jong u ha East Khasi Hills ha ka 24 tarik Jylliew, ha kaba u la pyniaid ia ka jingialang bishar bniah bad ki DEO, ki ERO, ki AERO, bad kiwei ki nongtrei ban lum jingtip ia ka jingiaid shaphrang bad ka jingpynkhreh jong ka jingtreikam jong ka SIR.
Kum shi bynta jong kane ka jingleit jngoh ia ki jaka thep vote, u Dr Joshi u la jurip ia ki jaka thep vote ha Sacred Heart Boys’ Primary School, Mawlai hapoh ka 15-Mawlai (ST) Assembly constituency bad ha Pine Mount Polling Station hapoh ka 16-East Shillong (ST) Assembly constituency.
U la bishar bniah ia ki jingdonkam bad ki jingtei ha baroh ar ki jaka bad u la iakren ia ki halor ka jingshakri sha ki nongthep vote, ki kam kiba iadei bad ka thup nongthep vote, bad ki jingpynbeit ban pyntreikam hok ia ka SIR bad ki heh kiba don ha ka jaka.
Ha kane ka jingleit jngoh, la kynthup ruh ia ka jingpynlong ia ka jingthung dieng ha ka jaka ba thep vote.
U Dr Joshi u la ïakren bad ki samla kiba kwah ban thep vote bad kyntu ïa ki ban ïashim bynta ha ka rukom jied synshar paidbah ynda ki la ïoh ïa ka hok ban pynrung kyrteng haka thuo kyrteng thep vote.
U la ban jur ia ka jingdonkam jong ka jingiashim bynta ha ka ilekshon bad ka kamram nongshong shnong ha kaba pynkhlain ia ka synshar paidbah.
