Shillong, Jylliew 22 : U Symbud Myntri ba khmih ia ka tnad PWD (Roads & Building) Bah Prestone Tynsong ha ka sngi Nyngkong, ula hiar jurip ia ka surok kaba dkut bad twa ha shnong Laitlyngkot ha ka sngi U Blei, kaba la ktah syndon ia ka leit ka wan jong ki kali bad ki briew na ka surok Shillong-Dawki.
La synran ia u DyCM da u MLA ka Sohra Bah Gavin Mylliem, u Deputy Commissioner ka East Khasi Hills Abhilash Baranwal, Commissioner & Secretary ka Tnad Revenue and Disaster Management Kong Matsiewdor War Nongbri, Secretary ka PWD Bah Bibat Syiem, Superintendent of Police ka East Khasi Hills Bah Vivek Syiem, ki Heh ka National Highways Authority of India (NHAI) bad ki nongmihkhmat ka Kompany ba pyntrei ia ka surok Shillong-Dawki.
Ka kynhun kala peitthuh ia ki bynta jong ka surok ba julor harum ka shnong Laitlyngkot bad hadien kila leit sha ka jaka ba twa lyngba ka shnong Umthli ban peit ia ka bynta jong ka surok ba twa na shiliang.
Hadien ka jingjurip, u Bah Prestone ula pyniaid ia ka jingialang bishar kam ha Inspection Bungalow ha Laitlyngkot ban iakren ia ki sienjam ba mardor na ka bynta ban leh eiei ia kane ka jngjia. Ki Ophisa kila iakren sani halor ka jingkhang shipor ia ka jingiaid ki kali bad ki briew lyngba kane ka shah ktah namar ka jingtwa ka surok, jinghap ki maw bad jingtwa khyndew kaba la pyndkut syndon ia ka surok.
Haba kren hadien ka jingialang, u Bah Prestone ula pynpaw ba ka jingshna biang ia kane ka bynta jong ka surok ba twa kan shim bha ia ka por namar ka jingjubor ka jingjulor.
Hynrei, u iathuh ba la ithuh mynta ia kawei pat ka surok lyngba ka by-lane ba iaid marjan ka jaka par maw jong ka KL Lyngkhoi bad iasoh sha Laitkynsew. La bthah ia ka Tnad PWD ba kan pynkhreh ia ki jingmang ia ka pisa ba donkam, katba ia ka NHIDCL la bthah ba kan pynsted wut wut ia ki kam ha kaban pynioh ia ka pisa.
Ula pyntip ba ka jingshna ia kane ka surok ba shipir kan sdang noh mardor tang mar syn ioh ia ka pisa, da ka jingthmu ban lah pyniasoh biang ia ka surok kham kloi kat kaba lah.
 Bah Prestone Tynsong ha ka sngi Nyngkong, ula hiar jurip ia ka surok kaba dkut bad twa ha shnong Laitlyngkot ha ka sngi U Blei, kaba la ktah syndon ia ka leit ka wan jong ki kali bad ki briew na ka surok Shillong-Dawki.){kind=link}