Shillong, Jylliew 22 : U Myntri Rangbah ka Jylla Conrad K Sangma ula kyrpad ia ka Defence Ministry ba kan pynbna ia ka bynta jong ka surok ba jah, kaba iasoh na Ranikor-Ratacherra kum ka project ba kongsan ia ka Ri (strategic), haba pynksan ba ka donkam bha na ka bynta ki kam pahara khappud bad ka ioh ka kot jong ka thain Shatei Lam Mihngi.
Kane ka jingkyrpad kala mih ha ka jingiakynduh bad u Myntri kam Iada Ri Rajnath Singh ha ka sngi U Blei ha Shillong.
U Conrad ula iathuh ba ula iakren ia bun ki jingtyrwa ba iadei bad ki jingtei bad u Rajnath, khamtam kito kiba iatakhuh bad ki kam jaka bad ka jingiatreilang bad ki bor shipai ha Shillong.
“Ngi la ioh ia ka jingiakren kaba lyngkot bad u Myntri kam Iada Ri”ong u Conrad hadien ka jingialang.
Ula kdew ba ki bor shipai kila don bun bha ha kylleng ka sor Shillong bad ki jaka ba markhap, kaba pynlong ia ka jingkyrshan jong ki kaba kongsan ha kiba bun ki project kiba dang iaid.
Ula kdew ia ka project ban pynheh ia ka Shillong Airport ha kaba ula ong “Ngi la ioh ia ka jingkyrshan ba pura na ka Defence Ministry bad ka jingtyrwa surok 4-Lane na Rilbong sha Barik Point, ia kaba “U Myntri kam Iada Ri ula dep ai ka jingkular ba un ai ka jingkyrshan ba pura”.
U Myntri Rangbah ula ong ba ka kam ba u kwah leh ban leh ka long ia ka surok Ranikor-Ratacherra kaba don ha khappud ka Bangladesh.
“Kham kongsan eh, mynta ka nga nga la ioh iakren ia ka mat kaba kongsan bha kaba dei ka lad pyniasoh na Ranikor sha Ratacherra” ula ong. Haba batai ia ka jingkongsan, u Conrad ula pynpaw b aka Meghalaya ka don ia u pud u sam ba jrong bha bad ka Bangladesh bad ka jingpyniasoh na Ranikor sha Dali ka dei kaba la pyntrei da ki bynta bynta.
“Na Dalu yn pyniasoh pat sha ka surok NH217, bad pyniasoh shaduh ka 127B bad nangne sha ka Jingkieng Phulbari-Dhubri. Kumta lada phi peit ia kine kiei kiei baroh, kane ka long ka lad pyniasoh kaba kongsan bha, ka ban ialam ia ngi baroh shaduh sha Silchar” ula batai.
U ong, kane ka dei ka bynta kaba jah-ka surok Ratacharee-Ranikor.
“Ngi la kyrpad ia ka Defence Ministry ba ka lah ban pynbna kum ka surok ba kongsan naar kam dei eh tang na ka bynta ki kam jong ka ioh ka kot lane ban pyndonkam u paidbah hynrei ka dei ka lad pyniasoh kaba donkam ha ka ban pynthikna ia ka jingshngain jong ka Ri” ong u Conrad haba pyntip ba u Rajnath Singh ula ai ia ka jubab kaba sngewtynnad ia kane ka jingtyrwa.
“Ula pdiang ia ka bad ula bthah ia nga ban wan iakynduh biang ia u bad pyntip ba un sa khmih ia kane ka kam ha ka lynti kaba dei” ong u Myntri Rangbah.
U bynrap ba u Myntri ka Ministry of Road Transport and Highway Nitin Gadkari ruh ula pynpaw kham hashuwa ba ka Defence Ministry kan shim ia ka bynta kaba kongsan, ta ka daw ula rah iakren ia kane ka mat beit beit bad u Rajnath Singh.
, haba pynksan ba ka donkam bha na ka bynta ki kam pahara khappud bad ka ioh ka kot jong ka thain Shatei Lam Mihngi.){kind=link}